ઉલટી ગંગા, દારૂડિયાએ બુટલેગરોને માર્યો માર, દારૂ લઇ ફરાર

દમણ: સંઘપ્રદેશ દમણના દારૂની હેરાફેરી કરતા બુટલેગરોને માર મારી કેટલાક અજાણ્યા ઈસમોએ તેમની પાસેથી દારૂનો જથ્થો લૂંટી લીધો હતો. બુટલેગરોને માર મારી રોડની સાઇડ પર ફેંકી દેવામાં આવ્યા હતા. જેને લઇને પાતળિયા ચેકપોસ્ટ પર પોલીસ પેટ્રોલિંગ સામે અનેક સવાલો ઉભા થયા છે.

ગાંધીના ગુજરાતમાં સંઘ પ્રદેશ દમણથી યેનકેન પ્રકારે દારૂની ખેપ કરતા હોય છે. પરંતુ શનિવારે દમણના પાતળિયા ચેકપોસ્ટથી ઉદવાડા થઈ સુરતના કામરેજ સુધી દારૂ લઈ જનારા બે બુટલેગરને અજાણ્યા ઈસમોએ માર મારીને દારૂ લૂંટી લેવાની ઘટના સામે આવી છે. મળતી માહિતી પ્રમાણે અઠવાડિયામાં બે વાર દારૂની હેરાફેરી કરવા આવતા સુરતના બે બુટલેગરો દમણથી દારૂનો જથ્થો લઇ વાહનની શોધમાં ઉદવાડા આવ્યા હતા.

તે સમયે એક લાલ રંગની ગાડીમાં આવેલા કેટલાક ઈસમોએ આ બંનેને ઉભા રાખી તેમની પૂછપરછ કરી અને પૂછ્યું હતું કે, શું આમાં દારૂ છે. બુટલેગરોએ હા પાડતાની સાથે જ કારમાં આવેલા ઇસમોએ તેમનો દારૂનો જથ્થો લઈ લીધો હતો અને તેમની ગાડીમાં મૂકી દીધો હતો. જે બાદ આ બંનેને બેરહમીપૂર્વક માર માર્યો હતો. બાદમાં તેમને જાહેરમાં ફેંકીને જતા રહ્યા હતા.

આ ઘટનાની જાણ આસપાસના લોકોને થતાં તેમણે તાત્કાલિક 108ને જાણ કરી હતી અને આ ઇજાગ્રસ્ત બુટલેગરોને પારડીની સરકારી હોસ્પિટલમાં દાખલ કરવામાં આવ્યા હતા. આ ઘટનામાં ભોગ બનનારા બુટલેગરે જણાવ્યું કે, તેઓ અઠવાડિયામાં એકવાર દમણથી દારૂની ખેપ કરતા હતા અને સુરતના કામરેજ અને કડોદરા સુધી દારૂનો જથ્થો પહોંચાડતા હતા.

અત્રે નોંધનીય છે કે, પોલીસના પેટ્રોલિંગમાં પણ છીંડા ચોક્કસપણે હશે એવું ફલિત થઇ રહ્યું છે. જેના કારણે જ આવી ઘટનાઓ બનતી હોય છે. હાલ તો પોલીસે આ બુટલેગરો વિરુદ્ધ તેમજ તેમને માર મારનારા અજાણ્યા ઈસમો વિરૂદ્ધ ગુનો નોંધી આગળની તપાસ શરૂ કરી છે.