એલર્ટ...ચોમાસની ઋતુમાં વધે છે ચામડી અને હેરફોલના રોગોનું પ્રમાણ

વાપી: ચોમાસાની ઋતુ દરમિયાન શરદી ઉધરસ અને પાણીજન્ય રોગોનું પ્રમાણમાં વધારો જોવા મળે છે. તે જ રીતે ચામડી અને વાળના રોગોનું પ્રમાણ પણ વધે છે. ,આવો જાણીએ ચોમાસામાં કંઈ રીતે ચામડીના રોગોથી બચી શકાય છે. તેમજ તેની સારવાર માટે શું કરવું જોઇએ તે જાણીએ.

ચોમાસાની ઋતુ આવે એટલે અનેકબીમારીઓ માજા મૂકતી હોય છે. એમાં પણ પાણી ભરાવાને કારણે મચ્છરજન્ય બીમારીઓ વધુ વકરે છે. સતત વરસાદી મૌસમમાં ભીંજાવાથી શરદી અને ઉધરસનો ચેપ લાગતો હોય છે. આવી જ રીતે ચોમાસા દરમિયાન ચામડીના રોગના પ્રમાણમાં અને હેરફોલના પ્રમાણમાં પણ વધારો નોંધાય છે.

ચોમાસાની ઋતુમાં સતત ભીંજાવાથી ચામડીના રોગમાં ફંગલ ઇન્ફેક્શન થવાનું પ્રમાણ ખુબ વધુ જોવા મળે છે. ત્યારે, આ અંગે વાપીના કોસ્મેટોલોજિસ્ટ ડૉ. અંકિતા ભટ્ટે વિગતો આપતા જણાવ્યું હતું કે, ચોમાસાની ઋતુમાં ભીંજાવાથી ફંગલ ઇન્ફેક્શન થતું હોય હોય છે. એ જ રીતે વાળ ભીના રહેવાથી હેરફોલ અને વાળ ખરવાનું પ્રમાણ વધે છે. ત્વચા ઓઈલી થઈ જાય છે.

મુખ્યત્વે ચામડી પર ફંગલ ઇન્ફેક્શન ખૂબ જ ખંજવાળ ઉત્પન્ન કરાવે છે. વાપી, વલસાડ, સેલવાસ અને દમણમાં ચોમાસાની ઋતુમાં પુષ્કળ વરસાદ વરસે છે. તે સાથે જ ભેજનું પ્રમાણ પણ વધે છે. જે મનુષ્યના શરીરના વિવિધ ભાગો અને મુખ્યત્વે પ્રાઇવેટ પાર્ટ પર ફંગલનો ચેપ લગાવે છે. મોટાભાગે પ્રાઇવેટ પાર્ટ પર પરસેવો થવો એ મુખ્ય કારણ છે. હાલમાં રોજની OPD માં 10થી 12 ફંગલ ઇન્ફેક્શનના દર્દીઓ વધી રહ્યા છે.

જો કે કેટલાક દર્દીઓને આ રોગ 6 માસથી લઈને 3 વર્ષ સુધીના જુના હોય છે. જે ચોમાસાની ઋતુમાં વધુ વકરે છે. ડૉ. અંકિતાના જણાવ્યા મુજબ, ચોમાસાની ઋતુ દરમિયાન લોકોએ બને ત્યાં સુધી સૂકા રહેવાનું પસંદ કરવું જોઈએ. જ્યારે પણ ચોમાસાની ઋતુમાં વરસાદમાં ભીંજાઈ ત્યારે ભીંના કપડાં બદલી શરીરને એકદમ સૂકું કરવું જરૂરી છે. એ ઉપરાંત રાત્રે સૂતી વખતે કે વહેલા સવારે ઉઠીને ન્હાતી વખતે એકદમ કોરા થયા બાદ જ કપડાં પહેરવા જોઈએ. ફંગલ એ જિદ્દી રોગ છે એ માટે સારા સ્કિન સ્પેશ્યલિસ્ટની સલાહ મુજબ ક્રીમ કે અન્ય દવાનો ઉપયોગ કરવો જોઈએ.ફંગલ મોટાભાગે ભેજવાળું વાતાવરણ, શરીરમાં નીકળતો પરસેવો અને સતત પાણીના સંપર્કમાં રહેવાથી ફેલાય છે. જે ક્યારેક દવાઓ લેવાથી થોડા સમય માટે નાબૂદ થાય છે અને તે બાદ ફરી ઉથલો મારે છે. જેથી લોકોએ પોતાના ખાનપાનમાં પણ કાળજી રાખવી જરૂરી છે. જો લોકો ખાનપાનમાં અને રહેણીકરણીમાં કાળજી રાખે તો પણ ફંગલના ચેપથી બચી શકાય છે. ચોમાસાની ઋતુમાં વરસાદી માહોલ બાદ નીકળતો ગરમાટો અને ભેજના કારણે શરીરમાં પરસેવો ઉત્પન્ન થાય છે. તે લાલ ચકામાં રૂપે જોવ મળે છે અને તે ક્યારેક ખૂબ ખંજવાળ પણ ઉત્પન્ન કરાવે છે.

ફંગલ નાના બાળકોથી લઈને મોટી ઉંમરના સ્ત્રી-પુરુષોને પણ થાય છે. ત્યારે, ચોમાસાની ઋતુમાં વરસાદમાં ભીંજાવાની ભલે મજા માણો પણ તે બાદ શરીરને કોરું પણ કરો તો જ શરદી સળેખમની સાથે ચામડીના રોગથી પણ બચી શકશો.