દમણમાં જેટી ગાર્ડનનું રાષ્ટ્રપતિ રામનાથ કોવિંદના હસ્તે ઉદઘાટન કરાશે

સંઘપ્રદેશ દમણમાં રાષ્ટ્રપતિ રામનાથ કોવિંદના હસ્તે નાની દમણમાં બનેલ જેટી ગાર્ડનનું ઉદઘાટન કરવામાં આવશે. સંઘપ્રદેશ નાની દમણ જેટી નજીક ગાર્ડન ઘણા સમયથી જર્જરિત હાલતમાં હતું. જેની કાયાપલટ થઈ ગઈ છે. બાળકો માટે રમત ગમતના સાધનો સહિત સી વ્યુ ગેલેરીથી સજ્જ આ ગાર્ડન પ્રવાસીઓમાં આકર્ષણ જગાવશે તે પ્રકારની સુવિધાઓથી સજ્જ કરવામાં આવ્યું છે.

દમણ: સંઘપ્રદેશમાં અનેક સુવિધાઓથી સજ્જ ગાર્ડનમાં બાળકોને રમવા માટે પ્લે એરિયા રાખવામાં આવ્યો છે. જેમાં હીચકા, સ્લાઇડ શૉ અને અન્ય રમતની સુવિધાની સાથે ગાર્ડનને સજ્જ કરવામાં આવ્યા છે. ગાર્ડનમાં વડીલ અને નાગરિકો માટે બેસવાની ખાસ સુવિધા રાખવામાં આવી છે. આ ગાર્ડનમાં સુરક્ષાને ધ્યાનમાં રાખી ઠેર-ઠેર સીસીટીવી કેમેરા લગાવવામાં આવ્યાં છે. ગાર્ડનમાં પ્રવાસીઓને આકર્ષવા એક માળની સી વ્યુ ગેલેરી બનાવવામાં આવી છે.

જ્યાંથી દમણગંગા નદી અને દરિયાના સંગમનો અદભુત નજારો માણી શકાશે. આવનારા દિવસોમાં આ ગેલેરી પર્યટકોને આકર્ષિત કરશે. આ ગાર્ડનમાં ચારેતરફ સુંદર રોપા લગાવ્યા છે અને રાત્રીના સમયે રંગબેરંગી લાઈટથી શણગારવામાં આવ્યું છે. મળતી માહિતી પ્રમાણે રાષ્ટ્રપતિ રામનાથ કોવિદની દમણ મુલાકાત દરમિયાન આ ગાર્ડનને તેમના હસ્તે પ્રવાસીઓ અને શહેરીજનો માટે ખુલ્લું મુકવામાં આવશે.