દમણમાં PUC સેન્ટરમાં લાગી લાંબી કતારો, ક્યાંક આક્રોશ તો ક્યાંક નિયમના વધામણાં

દમણ: દેશમાં સતત વઘી રહેલા માર્ગ અકસ્માતો રોકવા માટે તાજેતરમાં જ કેન્દ્ર સરકાર દ્વારા 'મોટર વ્હિકલ સંશોધન બિલ-2019' સંસદમાં પસાર કરાયું છે. સંશોધિત બિલની અનેક જોગવાઈઓ દેશભરમાં 1 સપ્ટેમ્બરથી લાગુ થઈ ગઈ છે. નવા કાયદા અનુસાર ટ્રાફિક નિયમોના ઉલ્લંઘનમાં દંડની રકમ 5 ઘણી અને 10 ઘણી વધારવામાં આવી છે. મોટો દંડ ભરવાની બીકે દમણમાં વાહન ચાલકોએ તાત્કાલિક ટ્રાફિક નિયમોનું પાલન કરવાનું શરૂ કરી દીધું છે. પી.યુ.સી કરાવવા માટે વાહન ચાલકોની લાંબી કતારો લાગી રહી છે અને વેઇટિંગ બોલાઈ રહ્યું છે.

મોટો દંડ ભરવાની બીકે દમણમાં વાહન ચાલકોએ તાત્કાલિક ટ્રાફિક નિયમોનું પાલન કરવાનું શરૂ કરી દીધું છે, દમણના તિન બત્તી નજીક સાગર પેટ્રોલ પમ્પ અને ડાભેલ પાસે પી.યુ.સી સેન્ટરમાં PUC કરાવવા માટે વાહન ચાલકોની લાંબી લાઈનો લાગી રહી છે. લોકો સવારથી સાંજ સુધી જયારે સમય મળે ત્યારે, કામ કાજ આટોપીને પી.યુ.સીની લાઈનમાં લાગી જાય છે. જો કે, નવા ટ્રાફિકના નિયમોથી ટ્રાફિક અવેરનેસ આવશે એ વિચારે કેટલાક વાહનચાલકો ખુશ પણ જોવા મળ્યા હતા. તો કેટલાક વાહન ચાલકોએ મોટા પ્રમાણમાં લેવામાં આવતા દંડ બાબતે નારાજગી વ્યક્ત કરી હતી. જ્યારે PUC સેન્ટર સંચાલકોએ જણાવ્યું હતું કે હાલ PUC માટે વેઇટિંગ ચાલી રહ્યું છે. લોકો પણ ક્રોધ ઠાલવતા હોય છે, પણ અમે દિવસ દરમિયાન માંડ 50 વાહનોમાં PUC ચેક કરી શકીએ છીએ.

જ્યારે વાહન ચલકોએ આક્રોશ ઠાલવતા જણાવ્યું હતું કે અહીં પી.યુ.સી કાઢવા આવતા વાહન ચાલકોમાંથી આજ સુધી એક પણ સરકારી અધિકારી કે પોલીસ વિભાગનો કર્મી દેખાયો નથી. જેને ધ્યાનમાં લઈને ઘણા લોકોએ આ ટ્રાફિક રૂલ્સ પોલીસ કે નેતાને બદલે માત્ર સામાન્ય માનવી માટે જ બનાવવામાં આવ્યો હોવાનો આક્રોશ વ્યક્ત કર્યો હતો. ટ્રાફિક રૂલ્સ તોડનાર વાહન ચાલકો માટે સરકારે નક્કી કરેલા નવા નિયમો મુજબ લાઈસન્સ વગર ડ્રાઈવિંગ કરવા પર 5000 રૂપિયા દંડ આપવો પડશે. નશામાં ગાડી ચલાવવા બદલ હવે પોલીસ 10000 રૂપિયા દંડ વસુલ કરશે. હેલમેટ નહી પહેરવા બદલ 100ની જગ્યાએ 1000 રૂપિયા દંડ તેમજ ત્રણ મહિના સુધી લાઈસન્સ સસ્પેન્ડ, ટુ વ્હીલર પર બેથી વધુ વ્યક્તિ બેસાડવા માટે 100ની જગ્યાએ 2000 દંડ અથવા 3 મહિના લાઈસન્સ સસ્પેન્ડ, ડ્રાઈવિંગ કરતી વખતે ફોન પર વાત કરવા માટે પહેલા 1000 અને હવે 5000 રૂપિયા દંડ. ઓવર સ્પીડિંગ માટે પહેલા 400 રૂપિયા હતો. હવે પહેલી વખત પકડાશે તો લાઈટ વ્હિકલ્સ પર 1000 થી 2000 રૂપિયા અને મીડિયમ પેસેન્જર કે કોમર્શિયલ વ્હીકલ પર 2000 થી 4000 રૂપિયાનો દંડ, બીજી વખત પકડાવા પર લાઈસન્સ જપ્ત. રેસિંગ અને સ્પીડિંગ માટે પહેલી વખત પકડાશે તો 1 મહિનાની જેલ અથવા 5000 રૂપિયા સુધી દંડ, બીજી વખત પકડાય તો 1 મહિનાની જેલ અથવા 10000 રૂપિયા સુધી દંડ ભરવો પડશે.