દમણ: સંઘપ્રદેશ દમણમાં કોરોનાના કેસ દિવસે દિવસે વધતા જાય છે. શરૂઆતના દિવસોમાં એટલે કે લોકડાઉન 1માં પ્રશાસન દ્વારા મરવડ હોસ્પિટલમાં 15 બેડની કોવિંડ 19 હોસ્પિટલ શરૂ કરાઇ હતી. પરંતુ હવે, દમણમાં કોરોનાનો કેર વધતા મરવડ સરકારી હોસ્પિટલ કોરોના માટે સ્પેશ્યલ તૈયાર કરવામાં આવી છે. અન્ય સારવાર અને બીમારી માટે મોટી દમણમાં આવેલા સરકારી દવાખાનામાં લોકોને મોકલાઇ રહ્યા છે.
સરકારી આવાસોને કોવિડ વોર્ડમાં ફેરવવા દમણ કલેકટરને કરાઇ રજૂઆત વધતા જતા કેસમાં સ્થાનિક લોકોની માગ છે કે, દમણમાં રહેલા સરકારી હાઉસ જેવા કે સર્કિટ હાઉસને કોરોના સારવાર માટે ખોલવામાં આવે, આ સર્કિટ હાઉસમાં 50થી વધુ બેડની સુવિધા દરેક કોરોના દર્દી માટે અલાયદી ફાળવી શકાય તેમ છે. સર્કિટ હાઉસમાં તમામ પ્રકારની રૂમ સહિતની સગવડ છે. જેને ધ્યાનમાં લઇને યુથ એક્શન ફોર્સના પ્રમુખ ઉમેશ પટેલે લેખિતમાં દમણ કલેકટરને આવેદન આપ્યું હતું. આવા સરકારી આવાસોને કોવિડ વોર્ડ બનાવવા જોઈએ તેવી રજૂઆત કરી હતી. સંઘપ્રદેશ દમણ-દીવ અને દાદરા નગર હવેલી પ્રશાસન કોરોનાની પરિસ્થિતિમાં અભૂતપૂર્વ કામગીરી કરી રહ્યું છે. પરંતુ વર્તમાન સ્થિતિને જોતા પ્રશાસન દ્વારા દમણના આ સર્કિટ હાઉસમાં સુવિધાઓ ઉપલબ્ધ હોવાથી અને સર્કિટહાઉસને પ્રશાસન દ્વારા આ મહામારીને ધ્યાનમાં લઇ જો ખુલ્લું મૂકવામાં આવે તો, લોકોને સુવિધા વધુ સારી આપી શકાય તેવી લોક માગ ઉઠી રહી છે. જેને પ્રશાસને તાત્કાલિક ધોરણે પ્રાધાન્ય આપવું જોઈએ તેવું ઉમેશ પટેલે જણાવ્યું હતું.
