એકાઉન્ટમાંથી 16 લાખ રૂપિયા ઉપાડી બીટકોઈન ખરીદનાર 2 ભેજાબાજની દમણ પોલીસે કરી ધરપકડ

ડિજિટલ યુગમાં ચોર પણ આધુનિક તરકીબો અજમાવી બેંક એકાઉન્ટમાંથી લાખો રૂપિયા ઉપાડી લેતા હોવાની અનેક ફરિયાદ સામે આવતી હોય છે. આવી જ એક ફરિયાદ બાદ દમણ પોલીસે 2 આરોપીઓની ધરપકડ કરી 16 લાખની ઉચાપતનો ગુનો ઉકેલી નાખ્યો છે.

• બેંક એકાઉન્ટની વિગતો લઈ 16 લાખ ઉપાડી લીધા
• ઇટલીમાં ઇવેન્ટ હોવાનું જણાવી બેંક એકાઉન્ટની ડિટેલ્સ લીધી
• દમણ પોલીસે 2 આરોપીઓની ધરપકડ કરી

દમણ: દમણના એક ઇવન્ટ ઓર્ગેનાઇઝરને ઇટલીમાં લગ્નની ઇવન્ટ ઓર્ગેનાઇઝ કરવાનું કહેવામાં આવ્યું હતું. જ્યારબાદ તેના બેંક એકાઉન્ટમાં 16 લાખ રૂપિયા જમા કરાવી ટીમ વ્યુઅર ઇન્સ્ટોલ કરેલ મોબાઈલ ભેટ આપી 16,09,600 રૂપિયા બેંક ખાતામાંથી ઉપાડી લીધા હતા. ત્યારબાદ બીટકોઈન ખરીદી ફરી તેને ભારતીય ચલણમાં અલગ અલગ એકાઉન્ટમાં ટ્રાન્સફર કરી કેશ ઉપાડી લેનાર 2 ભેજાબાજની દમણ પોલીસે ધરપકડ કરી છે.

દમણના પોલીસ હેડકવાટર્સ ખાતે દમણ જિલ્લા પોલીસવડા વિક્રમજીત સિંઘે પત્રકાર પરિષદનું આયોજન કરી દમણના એક ઇવન્ટ ઓર્ગેનાઇઝરના બેંક એકાઉન્ટમાંથી 16 લાખની રકમ ઉપાડી લેનાર આરોપીઓની ધરપકડ અને મોડ્સ ઓપરેન્ડીનો પર્દાફાશ કર્યો હતો.

મેરેજ ઇવન્ટનો કોન્ટ્રાકટ આપવાની લાલચ આપી

આ અંગે દમણ જિલ્લા પોલીસ વડા વિક્રમજીત સિંઘે વિગતો આપી હતી કે, ડિસેમ્બર 2020માં એક ફરિયાદીના બેંક એકાઉન્ટમાંથી ભેજાબાજ આરોપીઓએ 16 લાખ રૂપિયા ઉપાડી લીધા હતાં. "એજે 71 ઇવેન્ટ્સ" ના નામથી કંપની ચલાવતા ઇસમને પકડાયેલ બંને આરોપીઓ સાહિલ મંગલદાસ મોરઝારીયા ઉર્ફે રાજીવ કણકિયા ઉર્ફે શૈલેષ રમણ મહેતા ઉર્ફે જીગ્નેશ હસમુખ શાહ, અને કિશન નાગરદાશ બોકાણી ઉર્ફે અશોક જોશી ઉર્ફે રાજેશ રમેશ ઝવેરી ઉર્ફે વિશાલ હશમુખ શાહે ઇટાલીમાં લગ્નનો કાર્યક્રમ યોજાવાનો હોઈ તે ઇવન્ટનો કોન્ટ્રાકટ આપવાની લાલચ આપી હતી.

બેંકમાં 16 લાખ રૂપિયા જમા કરાવ્યા

જેમાં એકાઉન્ટમાં પાસપોર્ટ અને વિઝાની પ્રોસેસ કરવા સાથે 16થી 18 લાખ રૂપિયા હોવાનું જણાવ્યું હતુ. ઇવન્ટ ઓર્ગેનાઇઝરે તે બાદ તે વિગતો આરોપીઓને આપી હતી. એટલે આરોપીએ વિશ્વાસ કેળવવા ટીમ વ્યુઅર એપ્લિકેશન ઇન્સ્ટોલ કરેલ મોબાઇલ ભેટ આપી ઓનલાઇન ગેટવે અને વિવિધ વેબ સાઈટનો ઉપયોગ કરી 16 લાખની રકમ ઉપાડી લીધી હતી.

દમણ પોલીસે ભેજાબાજ આરોપીઓની મુંબઈથી ધરપકડ કરી

આરોપીઓ ઉપાડેલા પૈસામાંથી બીટકોઈન ખરીદતા હતા, જેને ત્યારબાદ અન્ય લોકોના એકાઉન્ટમાં ભારતીય ચલણ તરીકે ટ્રાન્સફર કરી તે પૈસા કેશ કરી લેતા હતાં. આ ફરિયાદ આધારે દમણ પોલીસે 1 મહિનાની સખત મહેનત બાદ બન્ને ભેજાબાજો મુંબઇથી ધરપકડ કરી હતી.

દમણ પોલીસે રોકડ રકમ અને ડુપ્લીકેટ દસ્તાવેજ કબ્જે કર્યા

દમણ પોલીસે પકડાયેલ બંને આરોપીઓ સામે IPC કલમ -420,406, 34 અને 66, 66 સી. 66- ડી IT એક્ટ હેઠળ ગુનો દાખલ કર્યો છે. પોલીસે આરોપીઓ પાસેથી નકલી દસ્તાવેજો, નકલી પાનકાર્ડ, આધારકાર્ડ સહિત એક લાખની રોકડ, 9 લાખના બીટકોઈનની વિગતો, અઢી લાખ રૂપિયા જે એકાઉન્ટમાં છે તે એકાઉન્ટને ફ્રીઝ કરી વધુ તપાસ હાથ ધરી છે. ઇસમોની વધુ પૂછપરછ કરતા આ ઈસમોએ પુણે, રાજસ્થાન, નવસારી અને અમદાવાદમાં શહેરમાં અન્ય 4 ગુના આચર્યાની કબૂલાત પણ કરી છે.