દમણમાં હત્યા કેસના આરોપીને કોર્ટમાં હાજર રહેવા પોલીસે માઈકથી એનાઉન્સ કર્યું

દમણ: જિલ્લામાં હત્યા કેસના આરોપીને માઇક દ્વારા એનાઉન્સ કરી પોલીસે વોરંટ બજાવ્યું હતું. આ વોરંટ દમણ જિલ્લા પંચાયતના પ્રમુખ સુખા પટેલને કોર્ટમાં હાજર થવા માટે બજાવવામાં આવ્યું હતું. તેની સામે એક વર્ષ અગાઉ ડાભેલના એક બારમાં અંધાધુંધ ફાયરિંગ કરાવી દમણના ભીમપોરમાં રહેતા અજય પટેલ અને ધીરજ પટેલની હત્યા કરાવવાનો ગંભીર આરોપ છે.

ડબલ મર્ડર કેસમાં પ્રમુખ સુરેશ પટેલ ઉર્ફે સુખાને જ્યુડીશીયલ મેજીસ્ટ્રેટે ભાગેડુ જાહેર કરી 13મી જાન્યુઆરીએ સવારે 10.30 કલાકે અથવા તે પહેલા કોર્ટમાં હાજર થવા ફરમાન કર્યું છે. કુંડ ફળિયા ભીમપોર દમણના રહીશ અને દમણ જિલ્લા પંચાયતના પ્રમુખ સુરેશ ઉર્ફે સુખા સામે નાની દમણ પોલીસ મથકે ગુનો નોંધાયેલો છે. આ અગાઉ સુરેશ પટેલ સામે ધરપકડ વોરંટ ઈસ્યૂ કરાયું હતું. પરંતુ આરોપી ઘરે ન મળતા તે વોરંટ સ્વીકારાયો ન હતો. જે બાદ સુરેશ ભાગતો ફરતો હતો.

પોલીસે ગુરૂવારે સુખા પટેલના વિસ્તારમાં ફરીને માઇક દ્વારા એનાઉન્સ કરી વોરંટ બજાવ્યુ હતું. જેને લઇ આશ્વર્ય ફેલાયુ હતું. આ અંગે દમણના એસપી વિક્રમજીત સિંહે જણાવ્યું કે, દમણમાં પહેલી વાર એનાઉન્સ કરાવી વોરંટ બજાવવામાં આવી રહ્યું છે. જેમાં લો પ્રમાણેની તમામ પ્રક્રિયા પુર્ણ કરી રહ્યા છીએ. આ ઓર્ડરમાં એ.પી.કોકડે, ઇંચાર્જ જ્યુડીશીયલ મેજીસ્ટ્રેટ ફર્સ્ટ ક્લાસ દમણ દ્વારા જણાવાયું છે કે, વાઇડ ઓર્ડર નં.પી-1777-2019 CRPC 82 અંતર્ગત આરોપીને હાજર રહેવાનું ફરમાન છે. તેમની સામે પરિવાદ કરવામાં આવ્યો છે કે, સુરેશ જગુભાઈ પટેલ ઉર્ફે સુખ પટેલે દંડનીય અપરાધ કર્યો છે. જે અંતર્ગત ધરપકડ વોરંટ બજાવવામાં આવેલું પરંતુ તે નહીં મળતા પરત આવ્યું છે. એટલે તેમને કોર્ટ સમક્ષ હાજર થવા આ ફરમાન કરવામાં આવ્યું છે. જેમાં 13-01-2020ના સમય 10.30 સુધીમાં હાજર રહેવા માઇક દ્વારા એનાઉન્સમેન્ટ કરવામાં આવ્યું છે.