વાપીમાં બાળક સાથે સૃષ્ટિ વિરુદ્ધનું કૃત્ય આચરનાર યુવકની ધરપકડ

વાપીઃ નજીક આવેલ ડુંગરા પોલીસ મથકમાં દુષ્કર્મની ફરિયાદ નોંધાતા ચકચાર મચી ગઇ છે. આ ફરિયાદમાં એક 16 વર્ષના યુવકે પોતાની બિલ્ડિંગમાં જ રહેતા 7 વર્ષના બાળક સાથે સૃષ્ટિ વિરુદ્ધનું કૃત્ય અને તે બાદ 5 વર્ષની બાળકી સાથે દુષ્કર્મ આચર્યું છે. પોલીસે હાલ આ સમગ્ર મામલે દુષ્કર્મ કરનાર યુવકની ધરપકડ કરી આગળની કાર્યવાહી હાથ ધરી છે.

વાપી નજીક એક ગામમાં રહેતા પરપ્રાંતીય પરિવારના અને ધોરણ 10માં અભ્યાસ કરતા યુવકે પોતાની બિલ્ડિંગમાં રહેતા એક 7 વર્ષીય બાળકને પોતાના ઘરે બોલાવી તેની સાથે સૃષ્ટિ વિરુદ્ધનું કૃત્ય કર્યું હતું. જેના બે દિવસ બાદ આ યુવકે બાળકની 5 વર્ષની બહેનને પણ બહેલાવી ફોસલાવી પોતાના રૂમમાં લઈ જઈ દુષ્કર્મ આચર્યું હતું. જોકે બાળકીએ સઘળી હકીકત તેમના માતા પિતાને કરી દેતા તેઓ હતપ્રભ બની ગયાં હતાં. અને તાત્કાલિક ડુંગરા પોલીસ મથકે જઇ ફરિયાદ નોંધાવી હતી.

16 વર્ષના બાળકે આચરેલા હીંચકારા કૃત્યની જાણ વાપીમાં થતા ચારેતરફથી યુવક પર ફિટકાર વરસી રહ્યો છે. જ્યારે સમગ્ર મામલામાં આરોપી યુવક પણ સગીર હોય જુવેનાઇલ કાયદા મુજબ ડુંગરા પોલીસે યુવકની ધરપકડ કરી આગળની કાર્યવાહી હાથ ધરી છે.