દમણ : તંત્ર દ્વારા દમણમાં ઔદ્યોગિક એકમોમાં કામ કરવા આવેલા મધ્યપ્રદેશના રિવા, કટની, સતના સહિતના જિલ્લાના શ્રમિકોને ખાસ શ્રમિક એક્સપ્રેસ ટ્રેન મારફતે તેમના માદરે વતન મોકલવાની કાર્યવાહી શરૂ કરવામાં આવી છે. જેમાં બુધવારે 1400 શ્રમિકોને સાંજે પાંચ વાગ્યે વાપીથી મધ્યપ્રદેશ રવાના કરવામાં આવ્યા હતા.
મધ્યપ્રદેશના 1400 શ્રમિકો વાપીથી શ્રમિક સ્પેશિયલ ટ્રેનમાં વતન રવાના થયા આ માટે પ્રશાસન દ્વારા સવારે જ વરકુંડમાં આવેલી ડેલ્ટીન હોટલની સામેના મેદાન પર શ્રમિકોની રજિસ્ટ્રેશનની પ્રક્રિયા શરૂ કરવામાં આવી હતી. જેમાં સંપૂર્ણ સોશિયલ ડિસ્ટન્સિંગના પાલન સાથે શિસ્તબદ્ધ રીતે માસ્ક પહેરીને કેન્દ્ર સરકારના દિશાનિર્દેશ મુજબ મેડિકલ ચેકઅપ કરીને શ્રમિકોનું રજીસ્ટ્રેશન કરવામાં આવ્યું હતું. અહીં આવતા શ્રમિકોને કોઈ મુશ્કેલી ન નડે એ માટે તંત્ર દ્વારા પાણીની બોટલ અને ફૂડપેકેટની પણ વ્યવસ્થા કરવામાં આવી હતી.
રજીસ્ટ્રેશન અને મેડિકલ થયા બાદ તેમને બસમાં બેસાડીને વિદાય આપવામાં આવી હતી. લોકડાઉનમાં વતન જવા ઇચ્છતાં શ્રમિકો માટે વાપીથી મધ્યપ્રદેશની સ્પેશ્યલ ટ્રેન મારફત પોતાના વતન જવાની વ્યવસ્થા કરવામાં આવતા શ્રમિકો ખુશખુશાલ જોવા મળ્યાં હતા.
