સંજેલી તાલુકાના તરકડા મહુડી ગામે 13 દિવસ અગાઉ એક જ પરિવારના છ સભ્યોની સામૂહિક હત્યા કરાઈ હોવાની ઘટના સામે આવતા ખળભળાટ મચી ગયો હતો. ઘટનાની માહિતી મળતાં DIG, DSP, નાયબ કલેકટર, મામલતદાર અને ધારાસભ્ય સહિતનો કાફલો ઘટનાસ્થળે આવી પહોંચ્યો હતો.
પોલીસ દ્વારા સઘન શોધખોળ કરાયા બાદ મૃતકના ઘરની નજીકના કૂવામાંથી હત્યા કરવામાં ઉપયોગમાં લેવાયેલી કુહાડી મળી આવતા વધુ તપાસ હાથ ધરી હતી. બીજા દિવસે કૂવાનું પાણી ખાલી કરીને વધુ તપાસ હાથ ધરાતાં પથ્થરમાં લપેટાયેલાં શર્ટ અને પેન્ટ મળી આવ્યાં હતાં. હાલ તો પોલીસને કુહાડી અને મૃતકનાં કપડા મળી આવ્યાં છે. જોકે હત્યાના 13 દિવસ વિતી જવા છતાં આ હત્યા કરવા પાછળનું કારણ શું છે અને હત્યા કોની મદદથી કરવામાં આવી હતી તેની તપાસ કરાઈ રહી છે.
