લીમખેડા કેન્દ્રનું 23.02% સાથે રાજ્યમાં સૌથી નીચું પરિણામ

ગુજરાત રાજ્ય માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ 12 વિજ્ઞાન પ્રવાહના જાહેર કરાયેલા પરિણામમાં દાહોદ જિલ્લાનું 33.23 ટકા પરિણામ આવ્યું છે. જિલ્લામાં લીમખેડા કેન્દ્રનું સૌથી ઓછુ 23.02%પરિણામ જાહેર થયું છે. જ્યારે A1 ગ્રેડમાં એક પણ વિદ્યાર્થી જિલ્લામાંથી પાસ થયો નથી. A2 ગ્રેડમાં ફક્ત 6 વિદ્યાર્થી જ પાસ થયા છે.

દાહોદ : ગુજરાત માધ્યમિક અને ઉચ્ચતર માધ્યમિક શિક્ષણ બોર્ડનું ધોરણ 12 સાયન્સનું પરિણામ જાહેર થયું છે. આ સાથે જ દાહોદ જિલ્લાનું પરિણામ 33.23 ટકા જાહેર થયું છે. દાહોદ કેન્દ્રનું 44.33 અને લીમખેડા કેન્દ્રનું 23.02 % પરિણામ છે. રાજ્યમાં જોવા જઈએ તો કેન્દ્ર પ્રમાણે સૌથી ઓછુ પરિણામ આ લીમખેડાનું રહેવા પામ્યું છે. 2019ની વાત કરીએ તો 2019માં જિલ્લાનું પરિણામ 34.92 હતુ. જેની સરખામણી આ વર્ષના પરિણામમાં 1.63 ઓછુ પરિણામ આવ્યું છે.

હાલ કોરોના વાયરસની મહામારી વચ્ચે સમગ્ર રાજ્યમાં લોકડાઉન જાહેર કરવામાં આવેલ છે. આવા સમયે વિદ્યાર્થીઓ સહિત તેઓના વાલીઓ ઘરે જ રહી પરિણામ મોબાઈલ ફોન તેમજ પોતપોતાના કોમ્પ્યુટર જેવા સાધનોથી ઓનલાઈન પરિણામ નીહાળ્યું હતુ. આ વર્ષે દાહોદમાં એ - વન ગ્રેડમાં એક પણ વિદ્યાર્થીનો સમાવેશ થયો નથી. જ્યારે એ -2 ગ્રેડમાં 6 વિદ્યાર્થીઓનો સમાવેશ થયો છે.

આ વર્ષે 1601 વિદ્યાર્થીઓએ પરિક્ષા આપી હતી, જેમાં વાત કરીએ તો ગ્રેડ પ્રમાણે વિદ્યાર્થીઓની તો આ વર્ષે એ - વન ગ્રેડમાં એકપણ વિદ્યાર્થીનો સમાવેશ થવા પામ્યો નથી. જ્યારે એ-2 ગ્રેડમાં 6, બી - 1 ગ્રેડમાં 30, બી - 2 ગ્રેડમાં 63, સી - વન ગ્રેડમાં 13, સી - 2 ગ્રેડમાં 218, ડી ગ્રેડમાં 81 વિદ્યાર્થીઓનો સમાવેશ થયો છે.

દાહોદમાં શાળા પ્રમાણે પરિણામની વાત કરીએ તો, દાહોદ અનાજ મહાજન સાર્વજનિક એજ્યુકેશન સોસાયટી સંચાલિત એમ.વાય.હાઈસ્કુલમાંથી આ વર્ષે 115 વિદ્યાર્થીઓએ પરિક્ષા આપી હતી. જેમાંથી 66 વિદ્યાર્થીઓ નાપાસ થયા છે.લિટલ ફ્લાવર્સ હાઈસ્કુલની વાત કરીએ તો,આ શાળામાંથી કુલ 127 વિદ્યાર્થીઓએ પરિક્ષા આપી હતી. જેમાંથી 37 વિદ્યાર્થીઓ નાપાસ થયા છે.