દાહોદના પ્રાકૃતિક આભૂષણ આરોગ્ય વનમાં I love dahohના સાઇનેજનું આકર્ષણ

દાહોદઃ જિલ્લા વહીવટી તંત્ર દ્વારા નગરજનોને આપવામાં આવેલા નવલા નજરાણા સમાન રાબડાલ સ્થિત પર્યટન સ્થળ આરોગ્ય વનની અત્યાર સુધીમાં અંદાજે ૨૦ હજારથી પણ વધુ લોકોએ મુલાકાત લીધી છે. 4.40 હેક્ટરમાં પથરાયેલ આ આરોગ્ય વન દાહોદના નગરજનોમાં આરોગ્ય વન પર્યટન સ્થળ તરીકે લોકપ્રિય બની ગયું છે. ત્યાં લગાવવામાં આવેલા આઇ લવ દાહોદના સાઇનેઝ દાહોદની મુલાકાત લેનારા નવાંગુતકોમાં અલગ છાપ ઉભી કરે છે. રાબડાલ આરોગ્ય વનની ૨૦ હજારથી વધુ લોકોએ મુલાકાત લીધી હતી, જ્યારે ૨૨૦૦ હેક્ટરમાં પથરાયલી રાબડાલની ગ્રાસલેન્ડનું ઘાસ સૌરાષ્ટ્ર, ઉત્તર ગુજરાતમાં અછતના સમયે ત્યાંના પશુઓની ક્ષૃધાતૃપ્ત કરે છે.

દાહોદ જિલ્લાના રામપુરા રેન્જમાં આવતી રાબડાલની વીડીમાં ૪.૪૦ હેકટર જમીનમાં સામાજિક વનીકરણ વિભાગ દ્વારા આરોગ્ય વનનું નિર્માણ કરવામાં આવ્યું છે. જેમાં વન વિભાગ દ્વારા કુલ ૬૧ પ્રકારના ૩૧૧૧ ઔષધીય અને સુશોભનના રોપાનું વાવેતર કરવામાં આવ્યું છે. આટલું જ નહીં, ઔષધીય રોપા આગળ તેના ગુણો, ક્યાં રોગમાં તે ઉપયોગી છે ? તેનું વર્ણન કરતા સાઇન બોર્ડ પણ લગાવવામાં આવ્યા છે. આ ઉપરાંત રાશિવનનું પણ નિર્માણ ત્યાં કરવામાં આવ્યું છે.

આરોગ્ય વનમાં ૧૩૨૭ ચોરસ મિટરનો પાથ વે, ૧૮૮૧ ચોરસ મિટરનો મેન ગેટ, એન્ટ્રી ગેટ અને વન કુટિર, બેસવાના આરામપ્રદ બાંકડા મૂકવામાં આવ્યા છે. વન વિભાગ દ્વારા હજુ પણ ત્યાં વિવિધ પ્રકારના કામો હાથ ધરવામાં આવનાર છે. જેમાં ચેકડેમ, પાણી માટે કૂવો અને બોર, આયુર્વેદિક સ્ટોર અને ફૂડ કોર્ટ, વન કુટિર સિટિંગ એરિયા, નાના બાળકો માટે પ્લે એરિયા, પીવાના પાણીની સુવિધા અને લાઇટ એરેન્જમેન્ટ કરવાનું વન વિભાગ દ્વારા આયોજન કરવામાં આવ્યું છે.

નેશનલ હાઇ વે ની નજીક આવેલા રાબડાલની વીડીની ટેકરી ઉપર બનાવવામાં આવેલા આરોગ્ય વનની જો તમે એક વાર મુલાકાત લેશો તો જરૂરથી પ્રકૃત્તિ સાથે એકાકાર થયા વીના રહેશો નહીં ! કારણ કે, આરોગ્ય વનની પાછળ આવેલી ટેકરીઓમાં પથરાયેલી ૨૨૦૦ હેક્ટરની ગ્રાસ લેન્ડ નયનરમ્ય નજારો ઉભો કરે છે. ખાસ કરીને ચોમાસામાં આ વિસ્તારે પ્રકૃત્તિની હરિયાળી ચાદર ઓઢી લીધી છે. પક્ષીઓનો કર્ણપ્રિય અવાજ અને પવનની લહેરખીઓ મનને ઝંકૃત કરી દે છે.

રાબડાલ વીડીની પણ એક વિશેષતા એ છે કે ૨૨૦૦ હેક્ટરમાં પથરાયલી આ ગ્રાસલેન્ડમાં પ્રતિ વર્ષ લગભગ ૧૪ લાખ કિલો ઘાસનું ઉત્પાદન થાય છે. તેના કારણે ૬૦૦ લોકોને રોજગારી મળે છે. વળી, સૌરાષ્ટ્ર અને ઉત્તર ગુજરાતમાં અછતના સમયે રાબડાલની વીડીનું ઘાસ ત્યાંના પશુઓની ક્ષૃધાતૃપ્ત કરે છે.