દાહોદ જિલ્લામાં ચાંદીપુરમ તાવના 4 શંકાસ્પદ કેસ, તંત્ર થયું દોડતું

દાહોદઃ જિલ્લામાં ચાંદીપુરમ વાયરલના શંકાસ્પદ દર્દીઓ મળી આવતા જિલ્લા આરોગ્ય તંત્ર દોડતુ થયું છે. ગ્રામ્ય વિસ્તારમાં ધામા નાખી તપાસની કામગીરી હાથ ધરવામાં આવી છે. દાહોદ જિલ્લાના મુવાડા, ખંગેલા, વટેડા અને સુરપુર ગામેથી કુલ 4 બાળકોમાં આ વાયરલના શંકાસ્પદ લક્ષણો જાવા મળ્યા છે.

જિલ્લામાં ચાંદીપુરમ તાવના શંકાસ્પદ દર્દીઓ મળી આવતા આરોગ્ય તંત્ર એક્શનમાં આવી ગયુ છે. તંત્ર દ્વારા સાવચેતીના પગલાં રૂપે ત્વરિત કામગીરી શરૂ કરી દેવામાં આવી છે. જિલ્લાના મુવાડા,ખંગેલા,વટેડા અને સુરપુર ગામમાંથી 4થી 9 વર્ષના 4 બાળકોમાં આ ચાંદીપુરમ તાવના શંકાસ્પદ લક્ષણો જોવા મળ્યા છે.

શંકાસ્પદ દર્દીઓના લોહીના નમૂના સાથે આસપાસના બીજા 21 જેટલા લોકોના નમૂના લઈ આરોગ્ય વિભાગ દ્વારા N.A.V. પુના ખાતે તપાસ અર્થે મોકલી દેવામાં આવ્યા છે.

મળતી માહિતી આનુસાર દાહોદ જિલ્લા આરોગ્ય તંત્ર દ્વારા 1319829 કાચા લીપણવાળા મકાનોની ચકાસણી કરવામાં આવી છે. જેમાં 34710 જેટલા કાચા મકાનોમાં લીપણ કરી ડસ્ટીંગ કરવામાં આવ્યું છે. આ ડસ્ટીંગમાં 5 ટકા મેલેથીયોન પાવડર અને ચુનો મિક્ષ કરી છાંટવામાં આવી રહ્યો છે. ચાંદીપુરમ વાયરલની ગંભીરતાથી નોંધ લઈ દાહોદ જિલ્લામાં આરોગ્ય દ્વારા સાવચેતીના પગલાં રૂપે આ કામગીરી હાથ ધરવામાં આવી રહી છે.