સમગ્ર દાહોદ જિલ્લામાં બપોરે 4થી સવારે 6 સુધી સ્વયંભૂ કર્ફ્યુ પાળવામાં આવશે

દાહોદ જિલ્લામાં છેલ્લા કેટલાક સમયથી કોરોના વાઇરસના સંક્રમણના કેસમાં ઉત્તરોત્તર ચિંતાજનક વધારો થવાના કારણે દાહોદ જિલ્લામાં ખાસ અધિકારી તરીકે રાજકુમાર બેનીવાલ અને જિલ્લા કલેક્ટર વિજય ખરાડીની અધ્યક્ષતામાં જિલ્લા વેપારી મંડળ સાથે બેઠક યોજવામાં આવી હતી. આ બેઠકમાં સર્વાનુમતે દાહોદ જિલ્લામાં સાંજે 4થી સવારના 6 કલાક સુધી સ્વંયભૂ બંધ પાળવાનો નિર્ણય લેવામાં આવ્યો છે.

• દાહોદમાં સ્વયંભૂ કર્ફ્યુ પાળવામાં આવશે
• વધતા જતાં કોરોના સંક્રમણને કાબૂમાં લેવા નિર્ણય
• જિલ્લા વેપારી મંડળોએ પણ આપ્યો સાથ

દાહોદ: જિલ્લામાં છેલ્લા એક તબક્કાથી કોરોના વાઇરસના કેસમાં થઇ રહેલા ચિંતાજનક વધારાને પગલે જિલ્લા વહીવટી તંત્ર દ્વારા તબક્કાવાર વિવિધ પગલાં લેવાઇ રહ્યા છે. તેમાં હવે દાહોદ જિલ્લાના વિવિધ વેપારી મંડળોનો પણ સહયોગ સાંપડ્યો છે. ખાસ અધિકારી રાજકુમાર બેનીવાલ અને કલેક્ટર વિજય ખરાડી સાથે બેઠકો બાદ એવો નિર્ણય લેવામાં આવ્યો છે કે સમગ્ર દાહોદ જિલ્લામાં બપોર બાદ ચાર વાગ્યાથી સ્વયંભૂ કર્ફ્યુ પાળવામાં આવશે. વેપારી મંડળોનો આ નિર્ણય આવકારદાયક છે. કોરોના વાયરસની બીજી લહેર વધુ ખતરનાક છે. વાયરસનું સંક્રમણ તીવ્રગતિથી ફેલાઇ રહ્યું છે. તેને રોકવા માટે રાજ્ય સરકાર તમામ પ્રકારના પગલાંઓ લઇ રહી છે. પણ જ્યાં સુધી લોકસહકાર ના મળે ત્યાં સુધી રાજ્ય સરકાર દ્વારા લેવાયેલા પગલાંઓ અપૂર્ણ છે. તે બાબતને ધ્યાને રાખીને દાહોદ જિલ્લાના વેપારી મંડળોએ સહકારમાં એક કદમ આગળ વધાર્યું છે અને ઉક્ત નિર્ણય લીધો છે.

બેઠકમાં ચર્ચા થયા બાદ એવું જાહેર કરવામાં આવ્યું છે કે, સમગ્ર દાહોદ જિલ્લામાં કોરોના વાઇરસનો પ્રકોપ શાંત ના થાય ત્યાં સુધી બપોર બાદ વેપારધંધા સંપૂર્ણપણે બંધ રાખવામાં આવશે. નાગરિકોએ આ બાબતની નોંધ લઇ બપોર બાદ ઘરની બહાર ખરીદીના હેતુંથી બહાર નીકળવું નહી. આ નિર્ણય નાગરિકોના વ્યાપક હિતમાં છે. આ નિર્ણય સમગ્ર દાહોદ જિલ્લામાં લાગું પડશે. હવે, બપોરના ચાર વાગ્યાથી સવારના છ વાગ્યા સુધી કર્ફ્યુ અમલમાં રહેશે. જિલ્લા વહીવટી તંત્ર અને પોલીસ તંત્ર દ્વારા ઉક્ત બાબતમાં સંપૂર્ણ સહયોગ આપશે. તેવું કલેક્ટર વિજય ખરાડી અને જિલ્લા પોલીસ વડા હિતેશ જોયસરે સંયુક્ત નિવેદનમાં જણાવ્યું છે.