દાહોદ: જિલ્લા કક્ષાના 74માં સ્વતંત્ર પર્વ 15 ઓગસ્ટની ઉજવણી સંદર્ભે જિલ્લા સેવા સદનમાં આવેલા કલેક્ટર કચેરીના સભાખંડમાં જિલ્લા સમાહર્તાના અધ્યક્ષ સ્થાને અધિકારીઓની બેઠક યોજવામાં આવી હતી.
દાહોદમાં રાષ્ટ્રીય પર્વની ઉજવણી સંદર્ભે કલેક્ટરની અધ્યક્ષતામાં બેઠક યોજાઇ - meeting was held in Dahod
દાહોદમાં કોરોના વાઇરસની સ્થિતિને ધ્યાનમાં રાખીને 74માં સ્વાતંત્ર્ય પર્વ 15 ઓગસ્ટની જિલ્લા કક્ષાની ઉજવણીમાં સામાજિક નિયમોના સંપૂર્ણ પાલન સાથે થાય એ રીતે આયોજન કરવા માટે કલેક્ટર વિજય ખરાડીની અધ્યક્ષતામાં બેઠક યોજાઈ હતી. સરકારની સ્પષ્ટ માર્ગદર્શિકા મુજબ દાહોદમાં રાષ્ટ્રીય પર્વની સૂંપર્ણ ગરિમા સાથે ઉજવણી કરવામાં આવશે.
દાહોદમાં જિલ્લા કક્ષાના રાષ્ટ્રીય પર્વની ઉજવણી સંદર્ભે કલેકટરની અધ્યક્ષતામાં બેઠક યોજાઇ
કલેક્ટર ખરાડીએ જણાવ્યું હતું કે, માત્ર આમંત્રિતોની ઉપસ્થિતિમાં પોલીસ પરેડ ગ્રાઉન્ડમાં 74માં સ્વાતંત્ર્ય પર્વની ઉજવણી કરવામાં આવશે. દેશભાવનાને ઉજાગર કરનારા સાંસ્કૃતિ કાર્યક્રમોની ડિજિટલ માધ્યમથી પ્રસ્તુતિ કરવામાં આવશે. સ્વાતંત્ર્ય પર્વના ઉજવણીમાં ધ્વજવંદન કરનારા મહાનુભાવ દ્વારા પરેડનું નિરીક્ષણ કરવાના બદલે માત્ર સલામી ઝીલવામાં આવશે. તે બાદ પ્રજાજોગ સંદેશો આપવામાં આવશે. આ ઉપરાંત જિલ્લા વહીવટી તંત્ર દ્વારા ફ્રન્ટલાઇન કોરોના વોરિયર્સનું સન્માન કરવામાં આવશે.
આઝાદી પર્વનો ઉત્સાહ જનજનમાં જાગે એ માટે દાહોદ નગરમાં આવેલી સરકારી ઇમારતોને રોશનીથી શણગારવામાં આવશે. આ સ્વાતંત્ર્ય પર્વની ઉજવણી લોકો જીવંત નિહાળી શકે એ માટે જિલ્લા વહીવટી તંત્ર દ્વારા દાહોદ માહિતી ખાતાના ફેસબૂક અને ટ્વીટર હેન્ડલ પર લાઇવ ટેલીકાસ્ટનું પણ આયોજન કરવામાં આવી રહ્યું છે. જેની લિંક ટૂંક સમયમાં જાહેર કરવામાં આવશે. તેમ કલેક્ટર ખરાડીએ ઉમેર્યું છે. આ બેઠકમાં જિલ્લા વિકાસ અધિકારી રચિત રાજ, નિવાસી અધિક કલેક્ટર એમ. જે. દવે, પ્રાયોજના વહીવટદાર બી. ડી. નિનામા સહિતના અધિકારીઓ ઉપસ્થિત રહ્યા હતા.