બે ગામનો પરોણો ભૂખ્યો રહેઃ ગામ ગુજરાતનું કે દાદરાનગરહવેલીનું એ મુદ્દે મેઘવાળ ગામનો ઘાટ જોકર જેવો બન્યો

લૉક ડાઉનમાં સંઘપ્રદેશ દાદરા નગર હવેલી પ્રશાસન માનવતાહીન અને તુમાખીભર્યા નિર્ણયોને કારણે સ્થાનિક લોકો માટે અને ગુજરાતના સરહદી વિસ્તારના લોકો માટે મુસીબતોનું પ્રશાસન બન્યું છે. પ્રશાસનના નિંર્ણયને કારણે દાદરા નગર હવેલીમાં વચ્ચોવચ્ચ આવેલા મેઘવાળ ગામમાં લોકો રોજગારી, રાંધણ ગેસ અને વીજળીની સુવિધા વિના જ લોકડાઉનના દિવસો પસાર કરી રહ્યાં છે.

સેલવાસ : કોરોના સંકટ સમયે સમગ્ર દેશ અને દુનિયા એક બનીને તેને નેસ્તનાબૂદ કરવામાં પડ્યાં છે. ત્યારે જેમ નેપાળ, પાકિસ્તાન અને ચીન ભારત સરહદને લઈને વિવાદ છેડી રહ્યાં છે. એવો જ વિવાદ ગુજરાત અને દાદરા નગર હવેલી દમણ પ્રશાસનમાં છેડાયો છે. ભારતના અભિન્ન અંગ હોવા છતાં દાદરા નગર હવેલી અને દમણ પ્રશાસન જાણે ભારતના જ ન હોય તેવા તુમાખીભર્યા નિર્ણયો કરી રહ્યું છે. જેનો ભોગ ગુજરાતના વલસાડ જિલ્લાના સરહદી ગામ મેઘવાળના લોકો બની રહ્યાં છે.

લોકડાઉનમાં કોરોનામુક્ત પ્રદેશનો એવોર્ડ મેળવવાની લાલસામા કહો કે પ્રદેશના હિત સાચવવાની નેમ, જે હોય તે પણ હાલ દાદરા નગર હવેલીમાં જ આવેલું અને ચારેતરફથી દાદરા નગર હવેલીની સરહદથી જોડાયેલ મેઘવાળ ગામ જાણે જોકર બન્યું છે. ગામની કુલ વસ્તીમાં 3 હજાર જેટલા લોકો દાદરા નગર હવેલીમાં રોજગારી મેળવે છે. ગામ વલસાડ જિલ્લાના કપરાડા તાલુકામાં આવે છે. પણ ખેડૂત ખાતેદારોને ખાતર બિયારણ માટે કપરાડા જઇ શકાતું નથી. ઉજ્જ્વલા યોજના હેઠળ ગામમાં રાંધણ ગેસ નાના પોન્ઢાથી આવે છે. તે વાહનોને સરહદ સીલ કરી પ્રવેશ અપાતો નથી.

બે ગામનો પરોણો ભૂખ્યો રહેઃ ગામ ગુજરાતનું કે દાદરાનગરહવેલીનું એ મુદ્દે મેઘવાળ ગામનો ઘાટ જોકર જેવો બન્યો

અભ્યાસ માટે જે વિદ્યાર્થીઓએ ધોરણ 12 પાસ કર્યું છે. તેઓ આગળના અભ્યાસ માટે ગામ બહાર નીકળી શકતાં નથી. એટલું જ નહીં ગામમાં વીજલાઈન ગુજરાતના ભીલાડ ફીડરમાંથી આવે છે. ત્યાં પણ સરહદ સીલ કરી દેતાં વીજળીની ક્ષતિ નિવારવા GEB કર્મચારીઓ આવી નથી શકતાં. આવી અનેક મુસીબતમાં ગામના લોકો ચૂલા પર ભોજન રાંધી અંધારામાં રાત પસાર કરે છે. માત્ર ને માત્ર દાદરા નગર હવેલી પ્રશાસનના સરહદ સીલ કરી બહારના રાજ્યના લોકોને પ્રદેશમાં નહીં આવવા દેવાના એક નિર્ણયથી આમ બની રહ્યું છે. આશા રાખીએ કે પ્રદેશના લોકોના હિત સાથે પડોશી રાજ્યના લોકોનું હિત સાચવવાની નેમ પણ દાદરા નગર હવેલી પ્રશાસન નીભાવે અને માનવતાનું આ કામ લેખે લાગશે તો લોકો જ સારા પ્રશાસન અને વહીવટકર્તા તરીકેનો એવોર્ડ આપોઆપ આપી દેશે.