7મી ફેબ્રુઆરીએ રાઠવા સમાજે આપ્યું જિલ્લા બંધનું એલાન

રાઠવા સમુદાયની આદિવાસી ઓળખ સામે ઊભા થયેલ પ્રશ્નોની બાબતે 7મી ફેબ્રુઆરીએ સમસ્ત આદિવાસી રાઠવા સમાજે છોટા ઉદેપુર જિલ્લા બંધનું એલાન આપ્યું છે.

છોટાઉદેપુર : જિલ્લામાં વસતાં આદિવાસી રાઠવા સમુદાયની ઓળખ સામે ઊભા કરવામાં આવેલ પ્રશ્નોના કાયમી નિકાલ તથા લોકરક્ષક ભરતીમાં રાઠવા સમાજના ઉમેદવારોને ઉચ્ચ મેરીટ હોવા છતા પસંદગીમાંથી ખોટી રીતે બહાર રાખવામાં આવેલ છે. તેના ન્યાય માટે ગાંધીચીધ્યા માર્ગે લડત લડવા 7મીએ સમસ્ત આદિવાસી રાઠવા સમાજ છોટાઉદેપુર જિલ્લા તરફથી બંધનું એલાન જાહેર કરવામાં આવ્યું છે. છોટાઉદેપુર જિલ્લામાં આવતા તમામ તાલુકા શહેરો છોટાઉદેપુર,કવાંટ,પાવીજેતપુર,બીડેલી,સંખેડા નસવાડી,બંધ રાખવા રાજકીયપક્ષો,વેપારી સંગઠનો,ખેડૂત સંગઠનો સામાજિક સંગઠનો,વિદ્યાર્થી સંગઠનો,મહિલા સંગઠનોને બંધ પાળીને સહકાર માટે અપીલ કરવામાં આવી છે.

ઉલ્લેખનીય છે કે જાતિના દાખલા બાબતે મુખ્યપ્રધાન અને આદિજાતિ પ્રધાનને રૂબરૂ મળવા છતાં રાઠવા જાતિ અંગે કોઈ નિર્ણય ન આવતાં રોષની લાગણી છે. બંધનો નિર્ણય લેવા મળેલી બેઠકમાં અનેક આદિવાસી આગેવાનો હાજર રહ્યાં હતાં.જેમાં પાવીજેતપુરના ધારાસભ્ય સુખરામભાઈ રાઠવા, યુવા નેતા સંગ્રામભાઈ રાઠવા, જિલ્લાપંચયત ઉપપ્રમુખ જગાભાઈ રાઠવા, અર્જુનભાઇ રાઠવા, શંકરભાઈ રાઠવા પણ ઉપસ્થિત રહ્યાં હતાં.