અમિત શાહની 'શાહી' ઉમેદવારી બાદ કોંગ્રેસના સી.જે.ચાવડાનો રજવાડી રોડ-શૉ

ગાંધીનગરઃ ગાંધીનગર લોકસભા બેઠક પર કોંગ્રેસના ઉમેદવાર ડૉ. સી.જે.ચાવડાએ ઉમેદવારીપત્ર ભરવા પહેલા વાસણ મહાદેવના દર્શન કરી પૂજા-અર્ચના કરી હતી. પૂજા-અર્ચના સમયે કલોલના ધારાસભ્ય બળદેવજી ઠાકોર, માણસાના પૂર્વ ધારાસભ્ય બાબુજી ઠાકોર પણ જોડાયા હતા, ત્યારબાદ ડીજેના તાલે વાસણથી ગાંધીનગર કલેક્ટર કચેરી સુધી ભવ્ય રોડ-શૉ યોજ્યો હતો. જેમાં 3 કિલોમીટર સુધી લાંબી કતારો લાગી હતી. સીજે ચાવડાએ રજવાડી રોડ-શૉ યોજ્યો હતો. જેમાં સી જે ચાવડાનો પરિવાર હાજર રહ્યો હતો. સમગ્ર જિલ્લા અને પ્રદેશના કોંગ્રેસના નેતાઓ રોડ શોમાં જોડાયા હતા. આ રેલીમાં તમામ સમાજના આગેવાનો પણ મોટી સંખ્યામાં જોડાયા હતા. મુસ્લિમ સમાજના આગેવાનો પણ ડૉ. ચાવડાની રેલીમાં જોડાયા હતા.

ગાંધીનગર લોકસભા બેઠક ઉપર ભાજપે રાષ્ટ્રીય અધ્યક્ષ અમિત શાહને મેદાનમાં ઉતાર્યા છે, જ્યારે કોંગ્રેસે ગાંધીનગર ઉત્તરના વર્તમાન ધારાસભ્ય ડૉક્ટર સી.જે.ચાવડાને મેદાનમાં ઉતાર્યા છે. અમિત શાહે 30 માર્ચના રોજ ઉમેદવારી પત્ર ભર્યું હતું. જેમાં રોડ-શૉ કરી શક્તિ પ્રદર્શન કર્યું હતું, ત્યારે કૉંગ્રેસના ઉમેદવાર ડૉ. સી.જે. ચાવડાએ અમિત શાહની શાહી ઉમેદાવરીને ટક્કર મારે તેવો રજવાડી રોડ શો યોજ્યો હતો. એક પ્રકારે ભાજપને ટક્કર આપે તેવું શક્તિ પ્રદર્શન થયું હતું. આ રોડ-શો વાસણ મહાદેવથી ગાંધીનગર કલેક્ટર કચેરી સુધી યોજાયો હતો. જ્યાં રાધેજા પેથાપુર અને ગાંધીનગરમા ઠેર ઠેર વિસ્તારોમાં તેનું સ્વાગત કરવામાં આવ્યું હતું.

ડૉક્ટર ચાવડાએ કહ્યું કે, ભાજપના રાષ્ટ્રીય અધ્યક્ષ અમિત શાહ સામે મારી જીત થશે. રોડ-શો રજવાડી ઠાઠમાં યોજાયો હતો, જ્યારે ડોક્ટર સી.જે.ચાવડા મહાદેવજીના દર્શન કરીને 51 કિલો ગોળ ચડાવ્યો હતો. સમગ્ર રોડ શો દરમિયાન ત્રણ કિલોમીટર સુધી વાહનોની લાંબી લાઈનો લાગી ગઈ હતી. જ્યારે 200 કરતા વધુ બાઈક સવાર રેલીમાં જોડાયા હતા.