ધરતીપુત્રોએ પાક વિમા મુદ્દે ઉગ્ર આંદોલનની ચિમકી આપી

ભાવનગર: જિલ્લાના ભાલ પંથકના 20 થી વધુ ગામના ખેડૂતો જિલ્લા કલેકટર, તાલુકા વિકાસ અધિકારી, તથા ભાવનગર ડિસ્ટ્રિક્ટ કો. ઓપરેટીવ બેન્કના અધિકારીઓને લેખીત મૌખિક રજુઆત કરી હતી. વર્ષ 2019ના ચોમાસાના પ્રારંભે અપુરતા વરસાદ તથા ત્યારબાદ અતિવૃષ્ટિના કારણે સેકડો એકરમાં કરવામાં આવેલા વાવેતર નિષ્ફળ ગયું હતું.

બે વખત કિંમતી બિયારણો નિષ્ફળ જતાં ખેડૂતોને મોટો આર્થિક ફટકો પડયો છે. પાક વિમો સમયસર ખેડૂતો ભરતા હોવા છતાં યોગ્ય સમયે વળતર ન મળતા ધરતીપુત્રોમાં ભારે રોષ ફેલાયો છે. બે સપ્તાહ પૂર્વ થયેલા ભારે વરસાદના કારણે ભાલના અનેક ગામડાઓમાં હજારો એકટર જમીનમાં પાણી ભરાયેલા છે. આ પંથકના ખેડૂતોને પાક નિષ્ફળતા અંગેનું જરૂરી વળતર મળે તેવી માંગ કરી રહ્યા છે. જો આ અંગે સરકાર વહેલી તકે પગલાં નહીં લે તો ગાંધી ચિધ્યા રાહે ઉગ્ર લડતની ચિમકી પણ ઉચ્ચારી છે.