અંકલેશ્વર GIDCમાં આવેલા સરદાર પાર્ક નજીકનું વીજ ટ્રાન્સફોર્મર હટાવી તેને સ્વામી નારાયણ ગુરુકુલ શાળાના કમ્પાઉન્ડ પાસે લગાવવાની વીજ કંપની દ્વારા કાર્યવાહી કરવામાં આવી હતી. છેલ્લા ઘણા સમયથી આ અંગેનો વિવાદ ચાલી રહ્યો હતો, ત્યારે વીજ કંપની દ્વારા કામગીરી શરુ કરાતા શાળા સંચાલકોએ વિરોધ નોધાવ્યો હતો.
શાળા સંચાલકો વાલીઓ અને બાળકો સાથે રસ્તા પર ઉતરી આવ્યા હતા. શાળા નજીક જ વીજ ટ્રાન્સફોર્મર હોય દુર્ઘટનાની આશંકા શાળા સંચાલકો વ્યક્ત કરી રહ્યા હતા. વિરોધ પ્રદર્શનના પગલે પોલીસ કાફલો પણ ઘટના સ્થળે પહોંચ્યો હતો અને બાળકોને પરત શાળામાં મોકલ્યા હતા.
બનાવની જાણ થતા જ વીજ કંપનીના અધિકારીઓ પણ ઘટના સ્થળે દોડી આવ્યા હતા અને બાદમાં પોલીસની મધ્યસ્થીમાં વીજ ટ્રાન્સફોર્મરનો કેટલોક ભાગ જ શાળા નજીક રાખવાનો નિર્ણય લેવાતા અંતે સમાધાન થયું હતું.
