ભરૂચમાં 5 બાળકોને બાઈક પર બેસાડી જીવલેણ સ્ટંટ કરનાર બાઈક ચાલક ઝડપાયો

ભરૂચના સ્ટેશન રોડ ઉપર 4થી 5 બાળકોના જીવ જોખમમાં મુકી બાઈક સ્ટન્ટ કરનારા યુવાનનો વીડિયો વાઇરલ થયા બાદ પોલીસે બાઈક ચાલકની ધરપકડ કરી છે.

ભરૂચઃ બે દિવસ અગાઉ ભરૂચમાં બાઈક સ્ટન્ટના એક વીડિયોએ ચકચાર મચાવી હતી. વીડિયોમાં નજરે પડતું હતું કે યુવાન 4થી 5 બાળકોના જીવ જોખમમાં મુકી ભરૂચના ભરચક સ્ટેશનરોડ વિસ્તારમાં બાઈક સ્ટન્ટ કરી રહ્યો હતો. ભરૂચ SP રાજેન્દ્રસિંહ ચુડાસમા દ્વારા વાઇરલ વીડિયોની તપાસ કરવામાં આવતા પોલીસે ગણતરીના સમયમાં બાઈક ચાલકની અટકાયત કરી છે.

બાળકોના જીવ જોખમમાં મુકનાર નરેશ વાડેકર વિરુદ્ધ ભરૂચ શહેર એ ડિવિઝન પોલીસ સ્ટેશનમાં ગુનોનોંધી ધરપકડ કરવામાં આવી છે. આરોપી નરેશ જાણ થતા તેને મોટર સાઇકલ સંતાડી દીધી હતી, જે પણ રિકવર કરવામાં આવી છે. આરોપી ભરૂચના દાંડિયા બજાર વિસ્તારમાં રહેતો હોવાનું બહાર આવ્યું છે. પોલીસે નરેશની ધરપકડ કરી ત્યારે તે નશાની હાલતમાં હોવાથી તેના પર વધુ એક ગુનો પણ દાખલ કરી પોલીસે આગળની કાર્યવાહી હાથ ધરી છે.