ભરૂચઃ વાહનને પાર્કિંગ ઝોનમાં જ પાર્ક કરવું નહિંતર ભરવો પડશે દંડ

ભરૂચ શહેરના મુખ્ય રસ્તાઓ સાંકડા છે અને ઉપરથી લોકો દ્વારા આડેધડ રીતે વાહનો પાર્ક કરવામાં આવતા હોવાથી ટ્રાફિકની સમસ્યા વિકટ બની છે. ગમે ત્યાં વાહનો પાર્ક કરી જતાં લોકોએ હવે સાવચેત રહેવું પડશે કારણ કે પાર્કિંગની જગ્યા સિવાયના સ્થળોએ વાહનોને પાર્ક કરેલા હશે તો તે વાહનોને જપ્ત કરવાની કમાગીરી પોલીસ વિભાગ દ્વારા હાથ ધરવામાં આવી છે.

• ટ્રાફિકની સમસ્યા દૂર કરવા પોલીસ આવી એક્શન મોડમાં
• હવે આડેધડ વાહનો પાર્ક કરશો તો ભરવો પડશે દંડ
• નો પાર્કિંગમાં વાહન પાર્ક કર્યું હશે તો પોલીસ વાહનને ટો કરી લઈ જશે

આ પણ વાંચોઃભરૂચ નજીક સર્જાતી ટ્રાફિકજામની પરિસ્થિતિને અંકુશમાં લેવા તંત્ર જાગ્યું

ટ્રાફિકની સમસ્યાના નિરાકરણ માટે પોલીસનો એક્શન પ્લાન

ભરૂચઃ શહેરમાં ટ્રાફિકની સમસ્યા હળવી બનાવવા હવે પોલીસે વાહનોને ટોઈંગ કરવાનું શરૂ કર્યું છે. શહેરના સ્ટેશન રોડ, સેવાશ્રમ રોડ, શ્રવણ ચોકડી, શકિતનાથ સહિતના મુખ્ય માર્ગો પર લોકો તેમના વાહનો ગમે ત્યાં પાર્ક કરી દેતાં હોય છે. આડેધડ રીતે પાર્ક કરી દેવાયેલાં વાહનોના કારણે ટ્રાફિકની સમસ્યા જટિલ બનતી જાય છે. વાહન ચાલકોને વારંવાર સૂચના આપવા છતાં તેમના વાહનો ગમે ત્યાં પાર્ક કરી દેતાં હોય છે. ખાસ કરીને જયાં શાકભાજીની લારીઓ ઉભા રહે છે તેવા વિસ્તારોમાં આ સમસ્યા સૌથી વધારે જોવા મળે છે. આડેધડ પાર્ક કરી દેવાતાં વાહનના માલિકો સામે હવે દંડનીય કાર્યવાહી શરૂ કરવામાં આવી છે.

આ પણ વાંચોઃભરૂચ પોલીસે ટ્રાફિક નિયમ તોડનારા વાહનચાલકો પાસેથી 1 મહિનામાં રૂ. 28 લાખ વસૂલ્યા

વાહનો માટે દંડ નક્કી કરાયો

ટુ -વ્હીલર ગમે ત્યાં પાર્ક કર્યું હશે તો 595 રૂપિયા, થ્રી વ્હીલર માટે 645 રૂપિયા, ફોર વ્હીલર માટે 695 રૂપિયા અને ભારે વાહનો માટે 750 રૂપિયા દંડ ભરવાનો રહેશે. ટો કરેલા વાહનને સ્થળ પર દંડ ભરી છોડાવી શકાશે અને વાહનનો માલિક હાજર નહિ હોય તો તે વાહનને કાળી તલાવડી સ્થિત પોલીસ હેડકવાટર્સ ખાતે લઇ જવામાં આવશે અને ત્યાંથી દંડની રકમ ભરી વાહનને પરત મેળવી શકાશે.