ડીસામાં એક સાથે ત્રણ બાળકોના જન્મથી 11 વર્ષ બાદ પરિવારમાં ખુશી

બનાસકાંઠાના ડીસામાં 11 વર્ષથી સંતાનસુખની ઝંખના રાખી રહેલા એક પરિવારમાં એક સાથે ત્રણ સંતાનો આવતર્યા છે. આ ઘટનાથી તબીબશાસ્ત્રમાં આશ્ચર્ય ફેલાયું છે. આ ત્રણેય સંતાન અત્યારે તંદુરસ્ત છે.

• ડીસામાં એક મહિલાએ પ્રસૂતિ દરમ્યાન ત્રણ બાળકોને આપ્યો જન્મ
• મેડિકલ તજજ્ઞોને પણ આશ્ચર્ય પમાડે તેવી ઘટના
• એક પરિવારમાં એક સાથે ત્રણ બાળકોનો જન્મ થતાં ખુશીનો માહોલ

બનાસકાંઠા:ડીસામાં મેડિકલ સાયન્સના જાણકારોને પણ માથુ ખંજવાળતા કરી નાખે તેવો બનાવ બન્યો છે. ડીસામાં એક મહિલાએ એક સાથે ત્રણ સંતાનોને જન્મ આપ્યો છે અને આ ત્રણેય સંતાનો સહિત માતા પણ તંદુરસ્ત છે. આ મહિલાના લગ્ન 11 વર્ષ પહેલા ડીસાના રેલવે સ્ટેશન વિસ્તારમાં થયા હતા અને 11 વર્ષથી આ મહિલાને સંતાન સુખ પ્રાપ્ત થતું ન હતું, મહિલાને ગર્ભ રહ્યા બાદ પ્રસૂતિની પીડા ઉપડતાં સારવાર માટે ડીસામાં આવેલી એક ખાનગી હોસ્પિટલમાં લઇ જવામાં આવી હતી, તે સમયે ડોક્ટર રાહુલ ચૌહાણે આ મહિલાની સમયસર પ્રસૂતિ કરાવવાનો નિર્ણય લેતાં આ મહિલાએ એક સાથે ત્રણ સંતાનોને જન્મ આપ્યો હતો.

આ પણ વાંચો:18 વર્ષના લગ્નજીવન બાદ નિઃસંતાન દંપતીને મળ્યું સંતાન સુખ, સિવીલના તબીબો જીત્યાં શિશુને બચાવવાનો જંગ

ડીસામાં મેડિકલ તજજ્ઞોને પણ આશ્ચર્ય પમાડે તેવી ઘટના આવી સામે

ડીસામાં આજે શુક્રવારના રોજ એક ખાનગી હોસ્પિટલમાં મહિલાને પ્રસૂતિ દરમ્યાન ત્રણ બાળકોને જન્મ આપ્યો હતો. આ ઘટના બાદ મેડિકલ ક્ષેત્રના તજજ્ઞો જણાવી રહ્યા છે કે, જ્યારે ટ્વીન્સ બાળકો હોય છે ત્યારે પણ મહિલા સહિત ગર્ભમાં રહેલા સંતાન માટે જોખમ હોય છે. પરંતુ આ કિસ્સામાં મહિલાએ ત્રણ સંતાનોને એકસાથે જન્મ આપ્યો છે અને આ ત્રણેય બાળકો એકદમ તંદુરસ્ત છે, જે ખરેખર આશ્ચર્ય પમાડે તેવી ઘટના છે. આજના આધુનિક યુગમાં કેટલાક એવા કિસ્સાઓ સામે આવતા હોય છે કે જે ખરેખર લોકોને આશ્ચર્ય પમાડે તેવા હોય છે.

પરિવારમાં ખુશીનો માહોલ

11 વર્ષ સુધી સંતાનસુખની રાહ જોનારા આ પરિવારમાં એક સાથે ત્રણ સંતાનો અવતર્યા છે, ત્યારે સ્વાભાવિક છે કે, પરિવારમાં ખુશી છવાઈ જાય, ત્યારે આ ખુશીના પ્રસંગે પરિવારના તમામ સભ્યો પણ ભાવુક થઇ ગયા હતા. આ પ્રસંગે આ બાળકોના પિતાએ મીડિયાને સંબોધતા જણાવ્યું હતું કે, અમારા લગ્નને 11 વર્ષ જેટલો સમય થયો હતો અને આ 11 વર્ષ દરમિયાન અમારા પરિવારમાં એક પણ સંતાન થયું ન હતું. પરંતુ કુદરતે આજે અમારા પરિવારમાં એક બે નહીં પરંતુ 2 બાળકી અને એક પુત્રને જન્મ આપતા પરિવારમાં ખુશીનો માહોલ જોવા મળી રહ્યો છે.

આ પણ વાંચો:ભરૂચના શ્રોફ નર્સિંગ હોમમાં થયો મીલેનીયમ બેબીનો જન્મ

તબીબોમાં પણ જોવા મળ્યું આશ્ચર્ય

ડીસાની એક ખાનગી હોસ્પિટલમાં આજે એક મહિલાએ 2 બાળકી અને એક બાળકને એક સાથે જન્મ આપતા ડોક્ટરો પણ અચરજ પામ્યા હતા પ્રસુતિ કરાવનાર ડોક્ટર રાહુલ ચૌહાણે મીડિયાને સંબોધતાં જણાવ્યું હતું કે, આવા કેસો ભાગ્યે જ જોવા મળતા હોય છે. જ્યારે પ્રસૂતિ માટે તેમની હોસ્પિટલમાં આ મહિલા પહોંચી ત્યારે તેમની હાલત બહુ ગંભીર હતી, તેને તાત્કાલિક ધોરણે અમારા દ્વારા આ પ્રસુતિ કરાવવામાં આવી હતી અને તેમને પ્રસૂતિ દરમિયાન 2 બાળકી અને એક બાળકને જન્મ આપ્યો હતો. મોટાભાગના કેસોમાં માત્ર બે જ બાળકો જીવિત હોય છે, પરંતુ આજે પ્રસૂતિ બાદ મહિલા પણ સુરક્ષિત છે અને તેમના ત્રણે બાળકો પણ સુરક્ષિત છે.