ડીસામાં એક દુકાનમાં લાગી આગ, વેપારીને રૂપિયા 17 લાખનું થયું નુકસાન

ડીસા શહેરના એન. આર.વિસ્તારમાં બુટ-ચંપલની દુકાનમાં ગુરૂવારે શોર્ટ સર્કિટના કારણે આગ લાગી હતી. જેમાં વેપારીને લાખોનું નુકસાન વેઠવાનો વારો આવ્યો છે. આ ઘટના સર્જાતાં ઘટના સ્થળે પોલીસ અને ડીસા નગરપાલિકા ફાયર ટીમ પહોંચી હતી અને આગને કાબુમાં લીધી હતી.

• ડીસામાં વધુ એક દુકાનમાં લાગી આગ
• એન. આર. માર્કેટમાં આવેલી દુકાનમાં શોર્ટ સર્કિટના કારણે લાગી આગ
• આગમાં વેપારીને લાખોનું નુકસાન

બનાસકાંઠાઃ જિલ્લામાં આગની ઘટનાઓમાં દિવસેને દિવસે વધારો થઈ રહ્યો છે. જિલ્લામાં ક્યાંક અકસ્માતમાં આગની ઘટનાઓ સામે આવી રહી છે, તો ક્યાંક શોર્ટસર્કિટના કારણે આગની ઘટનાઓ બની રહી છે. જિલ્લામાં છેલ્લા બે-ત્રણ મહિનાથી સતત આગની ઘટનાઓ જોવા મળી રહી છે. ત્યારે ગુરૂવારે ડીસામાં વધુ એક આગની ઘટના સામે આવી છે. જેમાં દુકાન માલિકને લાખો રૂપિયાનું નુકસાન વેઠવાનો વારો આવ્યો હતો.

દુકાનમાં આગ લાગી

ફાયર બ્રિગેડની ટીમે આગ પર મેળવ્યો કાબુ

ડીસાના એન. આર. માર્કેટમાં આવેલી એક દુકાનમાં શોર્ટ સર્કિટના કારણે આગ લાગી હતી. આ ઘટનાની જાણ થતાં જ દુકાન માલિક સહિત આજુબાજુના લોકો દોડી આવી ફાયર બ્રિગેટને જાણ કરી હતી. બનાવને પગલે ફાયર બ્રિગેડની ટીમે આવી સતત 5 કલાક સુધી પાણીનો મારો ચલાવી આગ પર કાબૂ મેળવ્યો હતો. પરંતુ આગ કાબુમાં આવે ત્યાં સુધીમાં દુકાનમાં રહેલો તમામ માલસામાન બળીને ખાખ થઈ ગયો હતો. આગમાં 4.81 લાખ રૂપિયા રોકડા સહિત કુલ 17 લાખ રૂપિયાનું નુકસાન થયું હોવાનું દુકાન માલિકે જણાવ્યું છે.

ડીસામાં એક દુકાનમાં લાગી આગ

અગાઉ સદર બજારમાં આવેલી એક દુકાનમાં લાગી હતી આગ

ઉલ્લેખનીય છે કે, ડીસા શહેરમાં છેલ્લા એક અઠવાડિયામાં આગની આ બીજી ઘટના સામે આવી છે. અઠવાડિયા અગાઉ સદર બજારમાં આવેલી એક દુકાનમાં આગ લાગતાં 10 લાખ રૂપિયાનું નુકસાન થયું હતું.

તમામ માલસામાન બળીને ખાખ

આગ લાગતાં ઘટનાસ્થળે મોટી સંખ્યામાં લોકો દોડી આવ્યાં

ડીસાના એન.આર વિસ્તાર આજુબાજુ 700થી પણ વધુ હોલશેલની દુકાનો આવેલી છે, ત્યારે ગુરૂવારે બુટ-ચંપલની દુકાનમાં ભયકર આગ લાગતાં ઘટનાસ્થળે આજુબાજુના વેપારીઓ મોટી સંખ્યામાં દોડી આવ્યા હતા અને અન્ય દુકાનોમાં પણ આગ ન લાગે તે માટે તાત્કાલિક ધોરણે તમામ દુકાનદાર પોતાની દુકાનો બંધ કરી દીધી હતી. જોતજોતામાં આગે વિકરાળ સ્વરૂપ ધારણ કરતાં વેપારીઓમાં પણ ભયનો માહોલ જોવા મળી રહ્યો હતો, પરંતુ નગરપાલિકાની ફાયરની ટીમે ભારે જહેમત બાદ આગને કાબુમાં લીધી હતી, જેથી આજુબાજુના વેપારીઓમાં રાહત જોવા મળી હતી.