ડીસાના વાડીરોડ વિસ્તારમાં નગરપાલિકાની ગંભીર બેદરકારી, ખુલ્લી ગટરમાં યુવક ડૂબી જતાં મોત

જિલ્લાના ડીસા શહેરમાં એક યુવકનું મોત થયું છે. જેમાં નગરપાલિકાની ગંભીર બેદરકારીના કારણે ખુલ્લી ગટરમાં ડૂબી જતાં યુવકનું મોત થયું હોવાનું પરિવારજનોએ ગંભીર આક્ષેપો કર્યા છે.

બનાસકાંઠા: ડીસામાં નગરપાલિકાની ગંભીર બેદરકારીના કારણે એક યુવકનું મોત થયું હોવાની ઘટના સામે આવી છે. વાડીરોડ વિસ્તારમાં આવેલી ખુલ્લી ગટરમાં મોડી રાત્રે ધસમસતા પ્રવાસમાં વરસાદનું પાણી જતું હતું અને ખુલ્લી ગટરની બરોબર લેવલમાં પાણી જતું હોવાના કારણે ત્યાંથી પસાર થતાં ભેરા લવાર નામના 30 વર્ષીય યુવકનો પગ લપસી જતાં ગટરમાં પડી ગયો હતો. ગટર 10 ફૂટ પહોળી અને 10 ફૂટ ઊંડી હોવાના કારણે યુવક ડૂબવા લાગ્યો હતો. બનાવના પગલે આસપાસના લોકો પણ ઘટના સ્થળે દોડી આવ્યા હતાં, પરંતુ આ યુવકને બચાવે તે પહેલા જ તે તણાઈ ગયો હતો. મોડી રાત સુધી શોધખોળ કરવા છતાં પણ તેનો અતોપતો ન લાગતા વહેલી સવારે તેનો મૃતદેહ એક કિલોમીટર દુર નદીમાથી મળી આવ્યો હતો. બનાવના પગલે પરિવારજનો પણ ઘટના સ્થળે દોડી આવ્યા હતા અને નગર પાલિકાની બેદરકારી હોવાનો આક્ષેપો કર્યા છે.

અગાઉ પણ સ્થાનિક લોકોએ વારંવાર નગરપાલિકામાં લેખિત અને મૌખિક રજૂઆત કરી હતી, તેમ છતાં પણ નગરપાલિકાએ સ્થાનિક લોકોની રજૂઆત ધ્યાને ન લઇ ખુલ્લી ગટરને પેક કરી નથી. વળી આ વિસ્તાર પણ ગરીબ અને ઝૂંપડપટ્ટી વાળો હોવાના કારણે આ ગટર પરથી રોજના 200 જેટલા લોકો પસાર થાય છે. આજુબાજુના વિસ્તારમાં રહેતા બાળકો પણ આ જ રસ્તાનો અવર જવર માટે ઉપયોગ કરે છે, ત્યારે આ ગટર ભયજનક હોવા હોવા છતાં નગરપાલિકાએ પેક ન કરતા આ દુર્ઘટના સર્જાઇ હતી. પાલિકાના ચીફ ઓફિસરે આ ઘટના નગરપાલિકાની બેદરકારી નહીં પણ યુવકની બેદરકારીના કારણે બની હોવાનું જણાવ્યું હતું.નગરપાલિકા દ્વારા ચોમાસા પૂર્વે લાખો રૂપિયા ખર્ચી પ્રિ-મોન્સૂન પ્લાનિંગની કામગીરી કરવામાં આવે છે. તેમ છતાં પણ ડીસામાં નગરપાલિકાની બેદરકારીના કારણે યુવકનું મોત થતા પ્રી મોન્સૂન પ્લાનિંગનો ફિયાસ્કો થયો છે અને ફરી આવી કોઈ ઘટના ન બને તે માટે તંત્રએ થોડી ગંભીરતા દાખવે તે અત્યંત જરૂરી છે.