ઉભરાતી ગટરો અને તૂટેલા માર્ગો, આ દ્રશ્યો ડીસા શહેરમાં આવેલા રેલવે સ્ટેશન નજીક આવેલા રબારી વાસના છે. એવું નથી કે આ વિસ્તારની હાલત પહેલેથી જ આવી બિસ્માર રહી હોય, પરંતુ એક સમયે અહીં પણ પાક્કા રસ્તા અને સુદ્રઢ ગટર વ્યવસ્થા હતી. આ વિસ્તારમાં 3 વર્ષ અગાઉ વિકાસના નામ પર ભૂગર્ભ ગટરનું કામ શરૂ કરવામાં આવ્યું હતું અને આ કામ શરૂ થયા બાદ આ વિસ્તારના તમામ રસ્તાઓ સંપૂર્ણ રીતે તોડી દેવામાં આવ્યા હતા.
અસંખ્ય રજૂઆતો છતાં પરિણામ શૂન્ય....
ભૂગર્ભ ગટરનું કામકાજ તો પૂર્ણ થયાને 3 વર્ષ જેટલો સમય વીતી ગયો, પરંતુ આ વિસ્તારમાં હજુ સુધી નથી તો માર્ગો બનાવવામાં આવ્યા કે નથી તૂટેલી ગટરોનું સમારકામ કરવામાં આવ્યું. જેને લઇને સ્થાનિક લોકો પરેશાન થઈ ઉઠ્યા છે. આ વિસ્તારના ખખડધજ માર્ગો પરથી પસાર થતી વખતે અનેક અકસ્માતો સર્જાઈ રહ્યા છે અને ઉભરાતી ગટરોને પગલે આ વિસ્તારમાં બીમારીઓ પણ ફેલાઈ રહી છે.