દાંતીવાડા તાલુકાના ડાભીપુરા ગામે મહિલા પર દીપડાએ હિંસક હુમલો કર્યો

દાંતીવાડા: બનાસકાંઠામાં દાંતીવાડા તાલુકાના ડાભીપુરા ગામ પાસે ખેતરમાં ઘાસ લેવા ગયેલી મહિલા પર દીપડાએ હુમલો કરતા મહિલાને ગંભીર ઇજા પહોંચી હતી. મહીલાને સારવાર અર્થે હોસ્પિટલ ખસેડાઇ હતી. આ બનાવની જાણ થતા જ પોલીસ અને વન વિભાગની ટીમ તાત્કાલિક ઘટનાસ્થળે પહોંચી હિંસક દિપડાની શોધખોળ હાથ ધરી હતી.

બનાસકાંઠા જિલ્લામાં જેસોર અભ્યારણ આવેલું છે જ્યાં દીપડા અને રીંછ જેવા હિંસક પ્રાણીઓ વસવાટ કરે છે, પરંતુ ક્યારેક પાણીની શોધમાં અથવા તો રસ્તો ભૂલી જવાના કારણે આ હિંસક પ્રાણીઓ અભ્યારણ પાસેના ગ્રામીણ વિસ્તારોમાં આવી ચડે છે. દાંતીવાડા તાલુકાના ડાભીપુરા ગામમાં અસ્મિતા ઠાકોર નામની મહિલા ખેતરમાં ઘાસ લેવા જઈ રહી હતી. તે દરમિયાન અચાનક દીપડાએ હુમલો કર્યો હતો.જો કે હુમલાથી ડરી ગયેલી મહિલાએ બૂમાબૂમ કરતા આજુબાજુના લોકો તાત્કાલિક દોડી આવતા દીપડો ત્યાંથી નાસી ગયો હતો .જ્યારે ગંભીર રીતે ઇજાગ્રસ્ત મહિલાને તાત્કાલિક સારવાર માટે ડીસાની ભણસાલી હોસ્પિટલ ખાતે ખસેડવામાં આવી હતી. આ બનાવની જાણ થતાં જ પોલીસ અને વન વિભાગની ટીમ પણ ડાભીપુરા ગામે આવી પહોંચી હતી અને હિંસક દિપડાની શોધખોળ હાથ ધરી હતી.મોડે સુધી દીપડોનો કોઇ જાણ ન લાગતા ગ્રામજનોમાં ભયનો માહોલ છવાયેલો હતો.