બનાસકાંઠાઃ હાલમાં કોરોના વાઇસની મહામારી વચ્ચે હોમગાર્ડ જવાનો દિવસ-રાત લોકોની સુરક્ષા માટે ફરજ બજાવી રહ્યા છે, ત્યારે બનાસકાંઠા જિલ્લા કલેક્ટર દ્વારા તેમને રાશન કિટનું વિતરણ કર્યું હતું.
નોવેલ કોરોના કોવિડ-19 વાઇરસના કારણે સમગ્ર દેશમાં લોકડાઉન જાહેર કરવામાં આવ્યું છે. ત્યારે પોલીસની સાથે હોમગાર્ડના જવાનો પણ ખભેખભા મિલાવી રાત-દિવસ ફરજ બજાવે છે.
લોકડાઉનમાં હોમગાર્ડના જવાનોને મદદરૂપ થવા બનાસકાંઠા જિલ્લા વહીવટીતંત્ર દ્વારા કલેક્ટર સંદીપ સાગલેના હસ્તે 202 જેટલી રાશન કીટનું વિતરણ કરવામાં આવ્યું હતું. આ પ્રસંગે કલેક્ટરે જણાવ્યું કે, લોકડાઉન દરમિયાન હોમગાર્ડના જવાનો ધોમધખતા તાપમાં ખૂબ સરસ ફરજ બજાવી કોરોનાની વૈશ્વિક મહામારી સામે લડી રહ્યા છે.
આવી પરિસ્થિતિમાં તેમને કોઇ મુશ્કેલી ન પડે તે માટે રાશન કીટનું વિતરણ કરવામાં આવ્યું છે. આ જવાનો પાર્ટ ટાઇમ બીજા કામો પણ કરતાં હોય છે. પરંતુ અત્યારે કોરોના મહામારીના સમયે રસ્તા ઉપર ઉભા રહી કોરોના સામે લડી રહ્યા છે. આ હોમગાર્ડના જવાનોમાંથી કેટલાંકને શારીરિક તકલીફો પણ છે, એ શારીરિક તકલીફો બાજુ એ મુકીને તેઓ દેશ સેવા અને બનાસકાંઠા જિલ્લાના લોકોની સેવા કરી રહ્યા છે, ત્યારે જિલ્લા કલેક્ટર સંદીપ સાગલેએ હોમગાર્ડના જવાનોની સેવાને બિરદાવી અભિનંદન પાઠવ્યા હતા.