રણની કાંધીએ અડીને આવેલા પછાત એવા બનાસકાંઠા જિલ્લાનો પણ વિકાસ થાય, રોજગારી વધે તે માટે સરકાર દ્વારા અહીં પણ 4 GIDCની સ્થાપના કરવામાં આવી હતી. પરંતુ GIDC શરૂ થયા બાદ અહીં સરકાર દ્વારા કોઈ દરકાર લેવામાં ના આવતા અહીંના ઉદ્યોગ બંધ થઈ રહ્યા છે. શહેરમા હાલ પાલનપુર, ડીસા, ચંડીસર અને દિયોદરમાં GIDC આવેલી છે. જેમાં 300 જેટલા પ્લોટ છે, શરૂઆતમાં આ તમામ પ્લોટમાં ઉધોગો ધમધમતા હતા.
મરચાની ફેક્ટરી,સાબુ, ઓઇલ, સાકરીયા, પાઇપ, દવા, લાટી, ગેસ એજન્સી, ગવાર મિલ સહિત અનેક ફેક્ટરીઓ આ GIDC માં કાર્યરત હતી. પરંતુ છેલ્લા 10 વર્ષમાં વિવિધ સસસ્યાઓના કારણે મોટાભાગના ઉદ્યોગ પડી ભાગ્યા છે, અહીં રોડ-રસ્તા, વરસાદ પાણી નિકાલની વ્યવસ્થા, ગટર, સ્ટ્રીટ લાઈટ, સેફટી સહિત અનેક સમસ્યાઓથી ફેક્ટરી માલિકો પીડાઈ રહ્યા છે. સરકારની GIDC પ્રત્યેની ઉદાસીનતાના કારણે અહીં ઉદ્યોગ વધવાને બદલે ઘટી રહ્યા છે.
પ્રાથમિક સુવિધાઓતો ઠીક, પરંતુ સાથે સાથે ઉદ્યોગોના વિકાસ માટે લોન પણ કોઈ બેન્ક આપવા તૈયાર નથી. અહીં લાખો રૂપિયાનો પ્લોટ હોવા છતાં પણ કોઈ બેન્ક લોન ના આપતી હોવાના કારણે ઉધોગકારોને આર્થિક મુશ્કેલીનો સામનો કરવો પડે છે. શરુઆતમાં તો તમામ યુનિટો ધમધમતા હતા. પરંતુ લોન ના મળવી, GST અને નોટબંધી બાદ મોટાભાગના ઉદ્યોગો પડી ભાંગ્યા છે. જેના કારણે અહીં ચાલતા 50 ટકાથી વધુ યુનિટો બંધ થઈ ગયા છે. જ્યારે બાકીના યુનિટો ચાલી રહ્યા છે. તે પણ મૃતપાય અવસ્થામાં છે. આ અંગે સ્થાનિક ઉદ્યોગકારોએ વારંવાર રજૂઆત કરી હોવા છતાં પણ સરકારે GIDCના કાર્યને વિકસાવવા માટે કોઈ જ પગલા લીધા નથી.
જિલ્લામાં આવેલી ચારેય GIDCના ઉદ્યોગકારો હાલમાં ભયંકર મંદીના કારણે ભારે હાલાકી ભોગવી રહ્યા છે. જેના કારણે અહીં રોજગારી પણ ઘટી ગઈ છે. પહેલા કરતા હાલમાં ૫૦ ટકાથી પણ વધુ ટર્નઓવર ઘટી ગયું છે, જેની સીધી અસર બનાસકાંઠા જિલ્લાના ધંધા-રોજગાર પડી રહી છે. આ અંગે ડીસા જીઆઇડીસી એસોસિએશનના પ્રમુખ લચ્છુભાઈ અગ્રવાલે જણાવ્યું હતું કે જો સરકાર પ્રાથમિક સુવિધાઓની સાથે સાથે સેફટી અને સિંગલ વિન્ડો સિસ્ટમથી ઉદ્યોગકારોને સહાય કરશે તો જ GIDCને મંદીના ભરડામાંથી બહાર લાવી શકાશે.