બનાસાકાંઠામાં 10થી વધુ કોંગ્રેસ કાર્યકર્તાઓએ કેસરીયો ધારણ કર્યો

પાલનપુર: ગુરૂવારે લોકસભા ચૂંટણી માટે પ્રથમ તબક્કાનું મતદાન થઈ રહ્યું છે અને ગુજરાતમાં ત્રીજા તબક્કામાં 23 એપ્રિલે મતદાન થશે, ત્યારે કોંગ્રેસના એક પછી એક કાર્યકર્તાઓ પક્ષ છોડીને ભાજપનો ખેસ ધારણ કરી રહ્યા છે. ગુરૂવારે ડીસા ખાતે યોજાયેલા ભારતીય જનતા પાર્ટીની સભામાં કોંગ્રેસના 10 થી વધુ કાર્યકર્તાઓ ભાજપમાં જોડાયા હતા.

ગુરૂવારે ડીસાના કંશારી ગામે બનાસકાંઠા બેઠકના ભાજપના ઉમેદવાર પરબત પટેલની સભા યોજાઈ હતી. જેમાં છેલ્લા કેટલાય સમયથી કોંગ્રેસથી નારાજ થયેલા કોંગ્રેસના 10 થી વધુ કાર્યકર્તાઓ ભાજપમાં જોડાયા હતા. જેમાં આ તમામ કાર્યકર્તાઓને બનાસકાંઠા બેઠકના ભાજપના ઉમેદવાર પરબત પટેલ દ્વારા ભાજપનો ખેસ પહેરાવ્યો હતો.

ગુજરાતમાં લોકસભા ચૂંટણી માટે હવે ગણતરીના દિવસો બાકી છે, ત્યારે બનાસકાંઠામાં કોંગ્રેસથી નારાજ કાર્યકર્તાઓ ભાજપમાં જોડાતા કોંગ્રેસને મોટો ફટકો પડી શકે છે. અલ્પેશ ઠાકોર કોંગ્રેસમાંથી રાજીનામું આપી દીધું છે. દરેક નેતાઓ પોતાની પ્રતિક્રિયાઓ આપી રહ્યાં છે. બનાસકાંઠા બેઠકના ભાજપના ઉમેદવાર પરબત પટેલે મોટું નિવેદન આપતા કહ્યું કે, “અલ્પેશ રાજીનામું આપી અમારી સાથે જોડાય છે એ જ અમારૂં સમર્થન છે. એટલે કે અલ્પેશ ભાજપમાં જોડાવવાની વાત અને ભાજપને સમર્થન આપી રહ્યાંની વાતને ક્યાંક સમર્થન મળી રહ્યું છે.”