અંબાજી યાત્રાધામ 51 શકિતપીઠમાંની સૌથી મોટી શકિતપીઠ ગણાય છે અને તેમાં પણ અંબાજીના દર્શન સાથે ગબ્બર ગઢના દર્શનનું વિશેષ મહત્વ સમાયેલું છે. ગબ્બર ગઢ ઊંચાઈની દ્રષ્ટિએ ગુરુ શિખર સમાન ગણવામાં આવે છે અને માં અંબાનું મૂળ સ્થાન પણ મનાય છે. અંબાજી દર્શન કરવા આવતા ભાવિક ભક્તો અચૂક ગબ્બરગઢ પર જાય છે.
પવિત્રતા અને સુંદરતા બક્ષતું માં અંબાનું ધામ ગબ્બરગઢ ચઢવાના 999 પગથિયા પણ તેટલા જ વખણાય છે. જે ચડે ગબ્બર થાય તે જબ્બર… તેવી કહેવત પણ બનેલી છે. ગબ્બર ગઢ પર કોઈ મૂર્તિ પૂજાતી નથી, પણ અખંડ જ્યોત પૂજાય છે. જેમ અંબાજી મંદિરમાં માં અંબા યંત્ર સ્વરૂપે બિરાજેલા છે. તેમ ગબ્બર ગઢ પર માતાજી જ્યોત સ્વરૂપે પૂજાય છે. જ્યાં આટલી ઊંચાઈ હોવા છતાં આ ગબ્બરની જ્યોત કોઈ દિવસ બુઝાતી નથી. ગબ્બર ઉપર જવા માટે ભક્તો પગપાળા પગથિયાથી ચઢીને અને અમુક ભક્તો રોપવે દ્વારા દર્શનાર્થે પહોંચે છે.
ગબ્બર ગઢ ઉપર અખંડ જ્યોતના દર્શનની સાથે સમગ્ર અંબાજી નગરીનો નજારો પણ ઘણો આકર્ષિત લાગે છે. અંબાજી ધામ અરવલ્લીની ગિરિ કંદરાઓમાં સમાયેલ હોય તેવું સ્પષ્ટ જોઈ શકાય છે. હાલ ભાદરવી પૂનમનો મેળો ચાલી રહ્યો છે. ભક્તો માં અંબાના દર્શન કરીને ધન્યતા અનુભવે છે. સાથે ગબ્બર પર ચઢીને માની જ્યોતના દર્શન કરીને પાવન થાય છે.
