ડીસાના RTO સર્કલ પાસે ટ્રક અને બાઈક વચ્ચે સર્જાયો અકસ્માત, બાઈક ચાલકનું મોત

ડીસાના RTO ચાર રસ્તા પાસે આવેલા મહાકાળી મંદિર સામે ટ્રક અને બાઈક વચ્ચે ગમખ્વાર અકસ્માત સર્જાયો હતો. જેમાં એક ટ્રક ચાલકે બાઇકને ટક્કર મારતા બાઇકચાલકનું ઘટના સ્થળે જ મોત થયું હતું.

• ડીસા આર.ટી.ઓ સર્કલ પાસે સર્જાયો ગોઝારો અકસ્માત
• અકસ્માતમાં ઘટના સ્થળે એકનું મોત
• વારંવાર સર્જાતાં અકસ્માતથી લોકોમાં ભય

બનાસકાંઠા : ડીસા આર.ટી.ઓ ચાર રસ્તા પાસે આવેલા મહાકાળી મંદિરની સામે ગમખ્વાર અકસ્માત સર્જાયો હતો. જેમાં એક ટ્રક ચાલકે બાઇકને ટક્કર મારતા બાઇકચાલકનું ઘટના સ્થળે જ મોત નીપજયું હતું. આ અકસ્માતમાંં 18 વર્ષીય ચૌધરી સમાજના યુવાનનું ઘટના સ્થળે જ કરૂણ મોત નિપજયું હતું. જોકે, અકસ્માત સર્જીને ભાગનાર ટ્રક ચાલકને ડીસા તાલુકા પોલીસે પકડી પાડી કાયદેસરની કાર્યવાહી હાથ ધરી હતી. અકસ્માતના પગલે ઘટના સ્થળે લોકોના ટોળેટોળાં ઉમટી પડ્યા હતા. ત્યારે ડીસા તાલુકા પોલીસે યુવકના મૃતદેહને પી.એમ અર્થે ડીસા સિવિલ હોસ્પિટલ ખાતે ખસેડી આગળની કાર્યવાહી હાથ ધરી હતી.

ગફલત ભર્યું ડ્રાઇવિંગ કરતા લોકો સામે કાર્યવાહી કરવા માગ

બનાસકાંઠા જિલ્લામાં મોટા વાહનોના ગફલત ભર્યા ડ્રાઇવિંગના કારણે વારંવાર નાના-મોટા અકસ્માતો સર્જાઈ રહ્યા છે. ખાસ કરીને વાત કરવામાં આવે તો બનાસકાંઠા જિલ્લાના ડીસા શહેરમાં છેલ્લા એક મહિનામાં 15 થી 20 જેટલા નાના-મોટા અકસ્માતો સર્જાયા છે. જેમાં અત્યાર સુધી આવા અકસ્માતોમાં અનેક લોકોએ પોતાની જિંદગી ગુમાવવાનો વારો આવ્યો છે. ત્યારે તાત્કાલિક ધોરણે આવા લોકો સામે પોલીસ દ્વારા કડક કાર્યવાહી કરવામાં આવે તો જ આગામી સમયમાં અકસ્માતોની સંખ્યા ઘટી શકે તેમ છે.