બનાસકાંઠાઃ દેશના વડાપ્રધાન નરેન્દ્ર મોદીનો 70મો જન્મ દિવસ છે, ત્યારે આજે આપણે એક એવા મોદી ભક્તને મળીશું જે ક્યારેય નરેન્દ્ર મોદીને રૂબરૂ મળ્યા નથી. પરંતુ તેમ છતાંય મોદીની ભક્તિમાં લીન છે. ડીસા તાલુકામાં આવેલા નાના રસાણાં ગામના ધારજીજી ઠાકોર છેલ્લા 21 વર્ષથી તેમના ઘરે અને દુકાનમાં મોદીજીની તસ્વીરો લગાવી તેમની નિત્યક્રમ મુજબ પૂજા અને આરતી કરે છે.
નરેન્દ્ર મોદીના કામની પ્રશંસા આજે દેશના દરેક લોકો લઈ રહ્યા છે. ત્યારે દર વર્ષે તેમના જન્મદિવસની ઉજવણી વખતે તેમના ભક્તો અલગ-અલગ પ્રકારે કરે છે. જ્યારથી નરેન્દ્ર મોદી ગુજરાતના મુખ્યપ્રધાન બન્યા ત્યારથી ગુજરાતમાં તેમની લોકચાહના સૌથી વધારે જોવા મળતી હતી. જ્યારે પણ નરેન્દ્ર મોદી સ્ટેજ પર પ્રવચન આપવા માટે આવે છે. ત્યારે તેમનું પ્રવચન સાંભળવા માટે લોકો કલાકો સુધી સ્ટેજ આગળ બેસી રહેતા હોઇ છે, ત્યારે આજે નરેન્દ્ર મોદી દેશના વડાપ્રધાન બન્યા છે, ત્યારે અનેક મોદી ભક્ત દેશમાં જોવા મળી રહ્યાં છે.બનાસકાંઠા જિલ્લાના ડીસા તાલુકામાં આવેલું નાના રસાણા ગામ ધારજીજી ઠાકોર નાના રસાણા ગામમાં તેમના જ ઘરમાં એક નાનકડી કરિયાણાની દુકાન ચલાવે છે. જે પીએમ મોદીના મોટા ફેન છે. મોટા મોદી ભક્ત ધારજીજી ઠાકોર તેમના જીવન કાળમાં ક્યારેય પણ નરેન્દ્ર મોદીને રૂબરૂ મળ્યા નથી પરંતુ તેમને ભગવાન માની બેઠા છે અને ભક્તિ કરી રહ્યા છે.