પાંથાવાડામાં લગ્ન પ્રસંગે 50થી વધુ લોકો એકત્રિત થતાં પોલીસ ફરિયાદ નોંધાઇ

કોરોના મહામારી વચ્ચે લોકો એક જગ્યાએ એકત્રિત ન થાય માટે સરકાર દ્વારા ગાઈડલાઈન બહાર પાડવામાં આવી છે. કોરોના મહામારી વચ્ચે બનાસકાંઠાના ગૂંદરી ગામે લગ્ન પ્રસંગે ગરબાનું આયોજન કરી સોશિયલ ડિસ્ટન્સનો ભંગ કર્યો હોવાની ઘટના સામે આવી છે. જેમાં લગ્ન આયોજક સામે એપિડેમિક એક્ટ મૂજબ ગૂનો નોંધી વધૂ કાર્યવાહી હાથ ધરી છે.

• એક જગ્યા પર લોકો વધુ એકત્રિત ન થાય તે માટે સરકારી ગાઈડલાઈન જાહેર કરી
• લગ્ન પ્રસંગોમાં 50 લોકોને જ અનૂમતિ આપવામાં આવી
• બનાસકાંઠામાં લગ્ન પ્રસંગે 200 લોકો ઉપસ્થિત રહ્યા

બનાસકાંઠા : સમગ્ર ગુજરાતભરમાં કોરોના વાયરસની મહામારીએ ભારે માથું ઉચક્યું છે અને લોકોના વધેલા સંક્રમણના કારણે દિવસેને દિવસે કોરોના વાયરસની સંખ્યામાં સતત વધારો થઈ રહ્યો છે. ખાસ કરીને હાલમાં કોરોના વાયરસના કેસમાં સતત વધારો થતા સમગ્ર ગુજરાતમાં હજારોની સંખ્યામાં કોરોના વાયરસના પોઝિટિવ દર્દીઓ સામે આવી રહ્યા છે. સાથોસાથ વધતા જતા કોરોના વાયરસના કેસમાં અત્યારસુધી અનેક દર્દીઓના મોત પણ થયા છે.

લગ્ન પ્રસંગે 50થી વધુ લોકો એકત્રિત થયા

કેટલાક લગ્ન પ્રસંગો પર લોકો 50થી પણ વધુ મહેમાનોને એકત્રિત કરી રહ્યા

સરકાર દ્વારા એક જગ્યા પર લોકો વધુ એકત્રિત ના થાય તે માટે સરકારી ગાઈડલાઈન જાહેર કરવામાં આવી છે. જેમાં મોટા મેળાવડા વરઘોડો જેવા અન્ય પ્રસંગો પર પ્રતિબંધ મૂકવામાં આવ્યો છે. જેના કારણે કોરોના વાયરસના કેસમાં ઘટાડો કરી શકાય તો બીજી તરફ હાલમાં લગ્નની સિઝન હોવાના કારણે સરકાર દ્વારા 50 લોકોને જ પ્રસંગે ભેગા કરવા માટે જાહેરનામુ બહાર પાડવામાં આવ્યું છે. આજે પણ કેટલાક લગ્ન પ્રસંગો પર લોકો 50થી પણ વધુ મહેમાનોને એકત્રિત કરી રહ્યા છે. ત્યારે હવે એક આવા લગ્ન પ્રસંગોનું આયોજન કરનાર લોકો સામે કાયદેસરની કાર્યવાહી કરવામાં આવી રહી છે.

લગ્ન પ્રસંગે 50થી વધુ લોકો એકત્રિત થયા

પાંચ દિવસ સુધી જનતા કરફ્યૂ આપવામાં આવ્યું

બનાસકાંઠા જિલ્લામાં કોરોના વાયરસ તેના પીક પર છે. રોજે-રોજ અઢીસોથી ત્રણસો જેટલા કોરોના પોઝિટિવ દર્દીઓની સંખ્યા સામે આવી રહી છે. જેને અટકાવવા માટે બનાસકાંઠા જિલ્લાના મોટાભાગના શહેરોમાં પાંચ દિવસ સુધી જનતા કરફ્યૂ આપવામાં આવ્યું છે. તેમ છતાં પણ કેટલાક લોકો સામાજિક પ્રસંગોમાં ટોળા એકત્ર કરી કોરોના વાયરસને રીતસર આમંત્રણ આપતા હોય તેવી ઘટનાઓ બની રહી છે.

200થી પણ વધુ લોકોની ભીડ એકત્રિત થઈ હતી

પાંથાવાડા પાસે આવેલી ગુંદરી ગામે પણ એક લગ્ન પ્રસંગે ગરબાનું આયોજન કરવામાં આવ્યું હતું. કોરોના મહામારી વચ્ચે પણ 100થી પણ વધુ લોકો ગરબે ઘૂમતા અને 200થી પણ વધુ લોકોની ભીડ એકત્રિત થઈ હતી. ઘટનાની જાણ થતા જ પાંથાવાડા પોલીસ ઘટનાસ્થળે પહોંચી હતી અને લગ્ન પ્રસંગે ગરબાનું આયોજન કરનાર નિલેશજી પરબત ઠાકોર સામે ડિઝાસ્ટર મેનેજમેન્ટ અને એપિડેમિક એક્ટ મુજબ ગુનો નોંધી આગળની કાર્યવાહી હાથ ધરી છે.