ડીસાના ખેડૂતની અનોખી કેળાની ખેતી, અનેક ખેડૂતો માટે બન્યા પ્રેરણારૂપ

બનાસકાંઠા જિલ્લાના ખેડૂતો અવનવા કીમિયા અપનાવી અલગ-અલગ ખેતી કરી સારી એવી આવક મેળવી રહ્યા છે. ત્યારે ડીસા તાલુકાના કાંટ ગામ ખાતે રહેતા ખેડૂતે પોતાના ખેતરના શેઢા પાડે કેળાની ખેતી કરી ખેડૂતોને વધુ આવક માટે નવો રાહ ચિંધ્યો છે.

• બનાસકાંઠા જિલ્લામાં ખેડૂતો વળ્યાં કેળાની ખેતી તરફ
• ડીસા તાલુકાના કાંટ ગામના ખેડૂતની અનોખી કેળાની ખેતી
• પૈસાના રોકાણ વગર કરે છે કેળાની ખેતી
  
• અન્ય ખેડૂતો માટે પ્રેરણારૂપ
  
  
  
  ડીસાઃ બનાસકાંઠા જિલ્લામાં પાણીની તંગી સર્જાતા ખેડૂતોએ ખેતી કરવાનું છોડ્યું હતું પરંતુ ગુજરાતમાં મોદી સરકાર દ્વારા નર્મદાનું પાણી બનાસકાંઠા જિલ્લાના છેવાડાના ગામ સુધી નહેર મારફતે લાવવામાં આવતા હાલમાં ખેડૂતો વિવિધ ખેતી કરી લાખો રૂપિયાની કમાણી કરી રહ્યા છે. ખેડૂતો પોતાની ખેતી થકી હાલમાં ભારત દેશમાં જ નહીં પરંતુ વિદેશમાં પણ જાણીતા બન્યા છે. ખેડૂતો દિવસે ને દિવસે વિવિધ ખેતી કરી બનાસકાંઠા જિલ્લો જે વર્ષોથી પછાતપણું ધરાવતો હતો તે ધીમે ધીમે દૂર કરી રહ્યા છે.
  

ખેડૂતો કેળાની ખેતી તરફ વળ્યાં

બનાસકાંઠા જિલ્લાના ખેડૂતો આમ તો વર્ષોથી પાણીની મોટી સમસ્યા હોવાનાં કારણે માત્ર સીઝન આધારિત ખેતી કરતા હતાં. પરંતુ દિવસેને દિવસે નવી ટેકનોલોજીમાં વધારો થતાં હાલમાં ખેડૂતો વિવિધ ખેતી તરફ વળ્યા છે. ખાસ કરીને બનાસકાંઠા જિલ્લામાં ખેડૂતો ચીલાચાલુ ખેતી છોડી હાલમાં સારી એવી ખેતી કરી લાખો રૂપિયાની કમાણી કરી રહ્યા છે. સરહદી વિસ્તારમાં દાડમની ખેતીમાં ખેડૂતો સારી એવી કમાણી કરી રહ્યા છે, તો બીજી તરફ બનાસકાંઠા જિલ્લામાં પ્રથમ વાર ડ્રેગન ફ્રુટ, મશરૂમ, જીરેનિયમ અને સ્ટ્રોબેરી જેવી ખેતી કરી ખેડૂતો હાલમાં મોટી આવક મેળવી રહ્યા છે. આ સાથે જ ખેડૂતોએ હવે નવી ખેતીની શરૂઆત કરી છે. આમ તો કેળાની ખેતી ગુજરાતમાં નડિયાદ બાજુ સૌથી વધુ જોવા મળે છે. પરંતુ હવે કેળાની ખેતીમાં બનાસકાંઠા જિલ્લાના ખેડૂતો પર કરવા માટે તૈયાર થયા છે. બનાસકાંઠા જિલ્લામાં ખેડૂતો હાલમાં કેળાની ખેતી કરી ઓછા રોકાણમાં સારી ખેતી કરી રહ્યા છે.

ડીસા તાલુકાના કાંટ ગામના ખેડૂતની અનોખી કેળાની ખેતી

કાંટ ગામના હરીજી મકવાણા પહેલા ચીલાચાલુ ખેતી કરતા હતાં. પરંતુ હરીજી મકવાણા છેલ્લા પાંચેક વર્ષથી અલગ અલગ ખેતી કરી સારી એવી કમાણી કરી રહ્યા છે. તેમના ખેતરમાં હાલ મોટા પ્રમાણમાં બટાટાનું વાવેતર કરેલ છે. પરંતુ છેલ્લા બે વર્ષથી જે શેઢાપાળાની જગ્યા વેસ્ટ પડી રહેતી હતી, તેનો સદુપયોગ કરી કેળાના છોડની વાવણી કરી હતી. જેમાં કોઈ માવજત કે કોઈ ખર્ચ કર્યા વગર સારી કમાણી કરી રહ્યા છે. કેળાના પાંચ છોડથી શરૂઆત કરેલી ખેતી હાલમાં હરીજી 200થી પણ વધુ કેળાના છોડ એકત્ર કરી તેની ખેતી કરી છે અને હાલમાં દર મહિને 30 હજારથી પણ વધુ આ કેળામાંથી આવક મેળવી રહ્યા છે.


અન્ય ખેડૂતો માટે પ્રેરણારૂપ

બનાસકાંઠા જિલ્લો આમ તો રણની કાંધી અડીને આવેલો જિલ્લો છે, પરંતુ ઘણા સમયથી બનાસકાંઠા જિલ્લાના ખેડૂતો અલગ અલગ પદ્ધતિથી ખેતી કરી સારી આવક મેળવી રહ્યા છે. નવી નવી ખેતી કરતા ખેડૂતોને જોવા માટે દૂર-દૂરથી ખેડૂતો આવતા હોય છે. ત્યારે ડીસા તાલુકાના નાનકડા ગામ એવા કાંટ ગામના હરીજી મકવાણા વેસ્ટ પડેલા શેઢાપાળાની જગ્યા પર કેળાની ખેતી કરી છે. જેમાં હરીજીને સારી આવક પણ થયેલી છે. તેમની આ ખેતી જોવા દૂર દૂરથી ખેડૂતો પણ આવી રહ્યા છે. તેમજ ડીસાના કે વી કે ના ડો.યોગેશ પવાર પણ આ કેળાની ખેતી જોવા માટે આવ્યા હતાં અને તેમની આ ખેતી કરવાની રીતને બિરદાવી હતી. તેમજ કેળાની ખેતીમાં શું માવજત રાખવી જોઈએ તે અંગે ખેડૂતોને માર્ગદર્શન પણ આપ્યું હતું અને ખેડૂતો જે પોતાના ખેતરમાં શેઢાપાળાની જગ્યા વેસ્ટમાં રાખતા હોય છે તેને સાચા અર્થમાં કઈ રીતે ઉપયોગ કરવો તે હરીજી પાસેથી શીખવા અપીલ કરી હતી.