માલપુરના અણીયોર ગામમાં મકાનની દીવાલ ધરાશાયી, આધેડ મહિલા અને બાળકીને ગંભીર ઈજા

અરવલ્લીઃ પંથકમાં વરસાદના કારણે કાચા મકાનોમાં ભેજ લાગતા દીવાલો ધરાશાયી થવાની ઘટનાઓ બની રહી છે. અણીયોર ગામમાં મકાનની દીવાલ ધરાશાયી થઈ હતી. જેમાં મહિલા અને બાળકી કાટમાળમાં દબાતા ભારે અફરાતફરી મચી હતી. ઘટનાની જાણ તંત્રને થતાં ઈજાગ્રસ્તોને સારવાર અર્થે હૉસ્પિટલ ખસેડવામાં આવ્યાં હતાં.

માલપુર તાલુકાના અણીયોર ગામમાં ચમાર ફળિયામાં મકાનની દીવાલ ધરાશાયી થઈ હતી. જેમાં આઠ વર્ષની મેઘા અને વૃધ્ધ રમીલાબેન જયંતિભાઇ ઇજાગ્રસ્ત થયા હતા. ઘટનાની જાણ તંત્રને થતાં બંને ઈજાગ્રસ્તોને સારવાર માટે વાત્રક રેફરલ હોસ્પિટલમાં દાખલ કરવામાં આવ્યા હતા.

આમ, છેલ્લા કેટલાય દિવસથી વરસી રહેલાં વરસાદના કારણે ગ્રામ્ય વિસ્તારમાં વસતાં લોકોને ભારે હાલાકી વેઠવી પડે છે. જમીન પોચી થવાના કારણે મસમોટા ખાડા પડી ગયા છે. તો ગામડામાં મોટાભાગના મકાન માટીના હોવાથી ગ્રામજનોના જીવ જોખમમાં મૂકાયાં છે.