અરવલ્લીમાં રામ મંદિર શિલાન્યાસને લઇને જશ્નનો માહોલ

શ્રીરામ જન્મભૂમિ શિલાન્યાસના અવસરે ફક્ત અયોધ્યામાં જ નહીં દેશભરમાં રામભક્તો માટે ઉત્સાહ અને ઉજવણીનો માહોલ પ્રવર્તી રહ્યો છે. રામજન્મભૂમિ મંદિર નિર્માણ માટેના સંઘર્ષ અને સદીઓની પ્રતીક્ષાનો હવે પનો ટૂંકો બની રહ્યો છે ત્યારે સ્વાભાવિક જ શિલાન્યાસના અવસરને લઇને ઉજવણી કરી પ્રાસંગિક બની રહી છે ત્યારે અરવલ્લીના મોડાસામાં પણ રામભક્તોએ યથાશક્તિ ઉજવણી કરી હતી.

મોડાસાઃ અયોધ્યામાં આજે રામ મંદિર નિર્માણનું શિલાન્યાસ કરવામાં આવ્યું છે. ત્યારે અરવલ્લી જિલ્લામાં દીવાળી જેવી ઠેર-ઠેર ઉજવણી કરવામાં આવી હતી. જિલ્લામાં વિવિધ સંગઠનો દ્વારા ફટાકડા ફોડી, મીઠાઈ વહેંચી હતી અને ભગવાન શ્રીરામની આરતી ઉતારવામાં આવી હતી ત્યારે રામભક્તો ઉત્સાહમાં ઝૂમી ઉઠ્યાં હતાં.

અયોધ્યા રામમંદિર શિલાન્યાસ અને નિર્માણને લઈને સમગ્ર દેશમાં ઉત્સાહનું વાતાવરણ છે. ત્યારે અરવલ્લી જિલ્લામાં તેમજ મોડાસા નગરમાં જશ્નનો માહોલ છવાયો હતો. મોડાસાના ચાર રસ્તા ખાતે નગરપાલિકા ટાઉન હોલ નજીક ભાજપ વીએચપી, બજરંગ દળ અને રામભક્તો મોટી સંખ્યામાં એકઠા થયાં હતાં. રામભક્તો દ્રારા આરતી તેમ જ રામધૂન સાથે "જય શ્રી રામ"ના ગગનભેદી નારાઓ અને ફટાકડા ફોડી ભવ્યાતિભવ્ય ઉજવણી કરવામાં આવી હતી. મોડાસા ચાર રસ્તા પર કાયદો અને વ્યવસ્થા જળવવા મોટી સંખ્યામાં પોલીસ કાફલો ખડકી દેવામાં આવ્યો હતો. આ ઉપરાંત મેઘરજ, બાયડ, ભીલોડા,ધનસુરા,શામળાજી સહિત ઠેર ઠેર રામભક્તોએ ઉજવણી કરી હતી.