મોડાસામાં ચણા અને એરંડાના 700 કટ્ટાની ચોરી કરનાર વેપારી પુત્ર સહિત 6ની ધરપકડ

મોડાસાની GIDCમાં આવેલા રામદેવ ઇન્ડસ્ટ્રીઝના ગોડાઉનમાંથી 21.66 લાખથી વધુના ચણા અને એરંડાનો 700 કટ્ટાના સ્ટોકની ઉઠાંતરી કરવામાં આવી હતી. આ બાદ, ગોડાઉનના માલિકે મોડાસા ટાઉન પોલીસ સ્ટેશનમાં ફરિયાદ નોંધાવતા પોલીસ દ્વારા 6 આરોપીઓની ઘરપકડ કરી 6.83 લાખથી વધુનો મુદ્દામાલ કબ્જે કરી કાયદેસરની કાર્યવાહી હાથ ધરી હતી.

• મોડાસાના ગોડાઉનમાંથી ચણા અને એરંડાનો 700 કટ્ટાનો જથ્થો ગાયબ
• પોલીસ સ્ટેશનમાં 21.66 લાખથી વધુની ચોરીની ફરિયાદ નોંધવામાં આવી હતી
• ચોરી મામલે, પોલીસે 6 આરોપીઓની ઘરપકડ કરી આગળની કાર્યવાહી હાથ ધરી

અરવલ્લી: મોડાસા તાલુકાના ગણેશપુર વિસ્તારમાં આવેલી GIDCના એક ગોડાઉનમાંથી રૂપિયા 21.66 લાખથી વધુના ચણા અને એરંડાનો જથ્થો ગાયબ થતા ચકચાર મચી હતી. આ અંગે, ગોડાઉનના માલિકે મોડાસા ટાઉન પોલીસ સ્ટેશનમાં ફરિયાદ નોંધાવતા પોલીસે તપાસના ચક્રો ગતિમાન કર્યા હતા. આ બાદ, તપાસમાં બહાર આવ્યુ હતું કે, ગોડાઉનના બાજુમાં ઘઉંની મીલ ધરાવતો પવન અમુલ મહેશ્વરી અને તેના મળતિયાઓએ આ કારસ્તાનને અંજામ આપ્યો છે. આ મામલે, પોલીસે 6 આરોપીઓની ઘરપકડ કરી આગળની કાર્યવાહી હાથ ધરી છે.

આ પણ વાંચો:અરવલ્લી પોલીસે અર્બુદા ક્રેડિટ સોસાયટી કૌભાંડમાં સંડોવાયેલા રાજસ્થાનના ઠગને ઝડપ્યો

ઘઉંની મીલના માલિકનો પુત્ર ચોર નિકળ્યો

મોડાસાની GIDCમાં આવેલા રામદેવ ઇન્ડસ્ટ્રીઝના ગોડાઉનમાં માર્કેટ યાર્ડના વેપારી સિરાજઉદ્દીન અબ્દુલરહેમાન પટેલે ચણા અને એરંડાનો 700 કટ્ટાનો સ્ટોક કર્યો હતો. જોકે, આ માલ પર ગોડાઉનની બાજુમાં આવેલા ઘઉંની મીલના માલિક પવન મહેશ્વરીને નજર હતી. કેટલાક દિવસ અગાઉ રાત્રીના સમયે પવન મહેશ્વરી અને તેની મીલમાં કામ કરતા માણસોએ રામદેવ ઇન્ડસ્ટ્રીઝના ગોડાઉનના પતરા ડ્રિલ મશીનથી ખોલી ચણા અને એરંડાની ચોરી કરી પતરા પાછા ફિટ કરી દીધા હતા. આ ઘટના બાદ, શરૂઆતમાં ગોડાઉનના માલિકને ખબર ન પડી પરંતુ, સ્ટોક મેળવણી કરતી વખતે 700 બોરી ઓછી હોવાની જાણ થતા ચોંકી ઉઠાયા હતા.

માલીકે ફરિયાદ નોંધાવતા ભાંડો ફૂટ્યો

આ અંગે ટાઉન પોલીસ સ્ટેશનમાં 21.66 લાખથી વધુની ચોરીની ફરિયાદ નોંધવાની સાથે શકમંદ તરીકે પવન મહેશ્વરી અને અન્ય શખ્સોના નામ આપ્યા હતા. ટાઉન પોલીસે પવન મહેશ્વરીની આગવી ઢબે પૂછપરછ કરતા તેણે વટણા વેરી નાખી ચોરી કરી માલ વેચી દીધો હોવાનું કબૂલી લીધું હતું.

આ પણ વાંચો:અરવલ્લીમાં શિક્ષિકાના પર્સમાંથી 40 હજાર રૂપિયા સરકાવી સગીરો ફરાર

ચોરીનો માલ ખરીદી કરનાર વેપારીને પણ ઝડપી લીધા

ટાઉન પોલીસ ચોરીનો માલ ખરીદી કરનાર વેપારી અને ચોરીના ગુન્હામાં સંડોવાયેલ 6 શખ્સોને ઝડપી પાડ્યા હતા. આ સાથે, ચણા અને એરંડાની ચોરીમાં ઉપયોગમાં લીધેલું છોટા હાથી અને ચણાની 180 બોરી મળી કુલ 6,83,520 રૂપિયાનો મુદ્દામાલ કબ્જે કરી કાયદેસરની કાર્યવાહી હાથ ધરી હતી.

ઘરફોડ ચોરી કરનાર અને માલની ખરીદી કરનાર આરોપી

• પવન અમુલ મહેશ્વરી (રાધાકુંજ સોસાયટી,મોડાસા)
• ભરત કાળા રાવળ ( રાવળ ફળી, મોડાસા)
• દિનેશ પ્રતાપ રાવળ (સર્વોદયનગર, મોડાસા)
• લાલસિંહ વક્તુસિંહ ખાંટ ( બાજકોટ,મોડાસા)
• યુસુફ નાથા બાંડી (જમાલવાવ,ઘાંચીવાડા,મોડાસા)
• રજાક ઉસ્માનગની બાંડી (સુકુનપાર્ક સોસાયટી,મોડાસા)