શામળાજી પોલીસે રૂપિયા 6.12 લાખનો વિદેશી દારૂ ઝડપી પાડ્યો

અરવલ્લી જિલ્લાની શામળાજી પોલીસે રાજસ્થાન સરહદ પર આવેલા અણસોલ ચેક-પોસ્ટ નજીક વાહનોનું સઘન ચેકીંગ હાથ ધર્યુ હતું. આ દરમ્યાન રાજસ્થાન તરફથી આવી રહેલ દારૂ ભરેલી ટ્રકનો ચાલક પોલીસને જોઇને ટ્રક મૂકી નાસી છૂટ્યો હતો. પોલીસે ટ્રકમાંથી મળી આવેલા 6.12 લાખ રૂપિયાનો વિદેશી દારૂ ઝડપી, કાયદેસરની કાર્યવાહી હાથ ધરી હતી.

• શામળાજી પોલીસે ઝડપ્યો વિદેશી દારૂ
• ટ્રક ચાલક ટ્રક છોડી ભાગ્યો
• 6.12 લાખ રૂપિયાનો વિદેશી દારૂ મળ્યો

અરવલ્લી : અરવલ્લી જિલ્લામાં શુક્રવારના રોજ શામળાજી પી.એસ.આઇ અનંત દેસાઈ અને તેમની ટીમે અણસોલ ગામની સીમમાં વોચ ગોઠવી હતી. રાજસ્થાનથી આવતા વાહનોનું સઘન ચેકીંગ ચાલી રહ્યું હતું. આ દરમ્યાન એક ટ્રક ચાલક અચાનક ટ્રક મૂકી ફરાર થઇ ગયો હતો. પોલીસે બીનવારસી ટ્રકની તલાશી લેતા તેમાં તૂટેલા કેરેટની આડમાં રાખેલ વિદેશી દારૂ મળી આવ્યો હતો.

દારૂ ભરેલી ટ્રક

દારૂની 2040 બોટલ મળી આવી

પોલીસને ટ્રક માંથી રૂપિયા 6,12,000 રૂપિયાની કિંમતનો ભારતીય બનાવટની વિદેશી દારૂની 2040 બોટલ મળી આવી હતી. પોલીસે ટ્રકની કીંમત રૂપિયા 7 લાખ મળી કુલ રૂપિયા 13.12 લાખનો મુદ્દામાલ જપ્ત કર્યો હતો. આ ઉપરાંત અજાણ્યા ટ્રક ચાલક વિરુદ્ધ પ્રોહીબીશન એક્ટ હેઠળ ગુનો નોંધી કાયદેસરની કાર્યવાહી હાથ ધરી છે. જ્યારે ફરાર ટ્રક ચાલકને ઝડપી પાડવા ચક્રો ગતિમાન કર્યાં હતા.