અરવલ્લીમાં સફાઈ કામદારોની માગ અંગે ગુજરાત વાલ્મિકી સંગઠને લોહીથી લખેલું આવેદનપત્ર આપ્યું

અરવલ્લીમાં ગુજરાત વાલ્મિકી સંગઠને સફાઈ કામદારોની પડતર માગણીને લઈને કલેક્ટરને આવેદનપત્ર આપ્યું હતું, પરંતુ આ આવેદનપત્ર કોઈ પેન કે પેન્સિલથી નહતું લખવામાં આવ્યું. સફાઈ કામદારોએ પોતાના લોહીથી લખેલું આવેદનપત્ર કલેક્ટરને સુપરત કર્યું હતું.

• અરવલ્લીમાં ગુજરાત વાલ્મિકી સંગઠને કલેક્ટરને આવેદનપત્ર આપ્યું
• સફાઈ કામદારોની માગણી અંગે રક્તથી લખેલું આવેદનપત્ર પાઠવ્યું
• પ્રોવિડન્ટ ફંડ, પગાર વધારા, વીમા પોલિસી વગેરે સફાઈ કામદારોની માગ
• માગણી સંતોષવામાં નહીં આવે તો આંદોલન ઉગ્ર કરવાની ચીમકી

મોડાસાઃ મેઘરજ નગરની ગ્રામ પંચાયતની અંદર વર્ષોથી કામ કરી રહેલા 30 સફાઈ કામદારો પોતાના અધિકારો માટે છેલ્લા 22 દિવસથી હડતાળ પર ઉતર્યા છે. જોકે, તંત્રએ તેમની સમસ્યા સામે આંખ આડા કાન કરતા ગુજરાત વાલ્મિકી સંગઠનના પ્રમુખ લાલજી ભગતે પોતાના લોહીથી લખેલું આવેદનપત્ર જિલ્લા કલેકટર અમૃતેશ ઔરંગાબાદકરને આપ્યુ હતું.

અરવલ્લીમાં સફાઈ કામદારોની માગ અંગે ગુજરાત વાલ્મિકી સંગઠને લોહીથી લખેલું આવેદનપત્ર આપ્યું

22 દિવસ સુધી મેઘરજ ગ્રામ પંચાયત સામે ધરણા કર્યા

છેલ્લા 22 દિવસથી અરવલ્લી જિલ્લાના મેઘરજ ગ્રામ પંચાયત સેવા આપી રહેલા આ સફાઈ કામદારો પોતાની પડતર માગણીઓને લઈ તંત્ર સામે ઝઝૂમી રહ્યા છે. 22 દિવસ સુધી મેઘરજ ગ્રામ પંચાયત સામે ધરણા કર્યા અને ઘરપકડ પણ વહોરી પણ તંત્રનું પેટનું પાણી ન હલતા તમામ સફાઈ કામદારો રેલી સ્વરૂપે જિલ્લા કલેકટરની કચેરીએ આવી પહોંચ્યા હતા.

અરવલ્લીમાં સફાઈ કામદારોની માગ અંગે ગુજરાત વાલ્મિકી સંગઠને લોહીથી લખેલું આવેદનપત્ર આપ્યું

લોહીથી લખેલું આવેદનપત્ર જોઈ કલેક્ટર ચોંકી ગયા

તંત્રના બેહરા કાને પોતાની વાત પહોંચાડવા માટે ગુજરાત વાલ્મિકી સંગઠનના પ્રમુખ લાલજી ભગતે પોતાના રક્તથી આવેદન પત્ર લખીને અરવલ્લી જિલ્લા કલેકટરને સુપરત કર્યુ ત્યારે કલેક્ટર પણ રક્તથી લખેલા આવેદન પત્ર જોઈ ચોંકી ઉઠ્યા હતા. સફાઈ કામદારોની માગ છે કે, તેઓને સુરક્ષા કિટ આપવામાં આવે. તેમ જ પ્રોવિડન્ટ ફંડ, પ્લોટ ફાળવણી, વીમા પોલિસી, દર વર્ષે પગાર વધારો કરવો અને લાંબા સમયથી કામ કરી રહેલા સફાઈ કર્મચારીઓને કાયમી કરવામાં આવે. વાલ્મિકી સમાજના પ્રમખે ચીમકી ઉચ્ચારી છે કે, જો આગામી દિવસોમાં તેમની માંગ સંતોષવામાં નહીં આવે તો ઉગ્ર આંદોલન કરવામાં આવશે.