સાવચેતી જરૂરી : આપણી મજામાં અન્યને સજા ન મળે તેનું ધ્યાન રાખીએ

ઉત્તરાયણના તહેવારને ગણતરીના દિવસો બાકી રહ્યા છે. ત્યારે આણંદ જિલ્લામાં એક જ દિવસે પતંગની દોરીથી ઇજાગ્રસ્ત થયાની બે ઘટનાઓ બનવા પામી છે. જેમાં બોરસદ ખાતે બનેલી દુર્ઘટનામાં દોરીના કારણે એક બાળકનું કમકમાટીભર્યું મોત નીપજ્યું છે. જ્યારે આણંદમાં એક યુવાનને પતંગની દોરીથી ગળે ગંભીર ઈજાઓ થવાની ઘટના બની છે.

• બોરસદમાં પતંગની દોરીએ સાત વર્ષનાં બાળકનો ભોગ લીધો
• આણંદ વિદ્યાનગર રોડ પર યુવકનું ગળું કપાયું
• યુવકને તાત્કાલિક સારવાર મળતાં જીવ બચ્યો

આણંદ : ઉતરાયણના તહેવારને ગણતરીના દિવસો બાકી રહ્યા છે. ત્યારે આણંદ જિલ્લામાં એક જ દિવસે પતંગની દોરીથી ઇજાગ્રસ્ત થયાની બે ઘટનાઓ બનવા પામી છે. જેમાં બોરસદ ખાતે બનેલી દુર્ઘટનામાં દોરીના કારણે એક બાળકનું કમકમાટીભર્યું મોત નીપજ્યું છે. જ્યારે આણંદમાં એક યુવાનને પતંગની દોરીથી ગળે ગંભીર ઈજાઓ થવાની ઘટના બની છે.

સાવચેતી જરૂરી : આપણી મજામાં અન્યને સજા ન મળે તેનું ધ્યાન રાખીએ

બોરસદમાં પતંગની દોરીના કારણે 6 વર્ષના બાળકનું મોત

પ્રાપ્ત વિગતો અનુસાર બોરસદ શહેરના ફતેપુર વિસ્તારમાં રહેતો મુરસલીન મીરઝા પોતાના છ વર્ષના પુત્ર સહદને બાઈક પર બેસાડીને સુર્યમંદિર રોડ પરથી પસાર થઈ રહ્યો હતો. ત્યારે એકાએક બાળકના ગળામાં પતંગની દોરી ભરાઈ જવા પામી હતી. જેને લઈને ગળુ કપાઈ જતાં લોહી નીકળવા માંડ્યું હતુ. જેને તાત્કાલીક શહેરની ખાનગી હોસ્પિટલમાં સારવાર માટે લઈ જવામાં આવ્યો હતો. જ્યાં હાલત ગંભીર હોવાથી બાળકને બીજી હોસ્પિટલમાં લઈ જવાનું જણાવ્યું હતુ. પરિવારજનોએ 108 મોબાઈલને જાણ કરવા છતાં પણ અડધા કલાક સુધી એમ્બ્યુલન્સ આવી નહોતી. જેને લઈને સહદનું તરફડીને મોત થયું હતુ. બનાવને લઈને હોસ્પિટલ ખાતે પરિવારજનો અને લોકોના ટોળા ઉમટી પડ્યા હતા અને પરિવારજનોએ ભારે આક્રંદ કરી મુક્યું હતુ. આ અંગે બોરસદ શહેર પોલીસે કાર્યવાહી હાથ ઘરી છે.

આણંદમાં યુવાનના ગળામાં દોરી ભરાઈ જતાં ઘાયલ

આણંદમાં યુવાનના ગળામાં દોરી ભરાઈ જતાં યુવાન ઘાયલ થયો હતો. જેમાં આણંદ શહેરના એપીસી સર્કલ પાસે 27 વર્ષીય અંકિત રાજપુત એક્ટિવા પર એપીસી સર્કલ પાસેથી પસાર થતો હતો. ત્યારે એકાએક ચાલકના ગળામાં પતંગની દોરી ભરાઈ જતાં ઘાયલ થયો હતો. જેને 108 ની ટીમે પ્રાથમિક સારવાર આપીને વધુ સારવાર માટે કરમસદની શ્રીકૃષ્ણ હોસ્પિટલમાં લઈ જવામાં આવ્યો હતો. જેમાં યુવકને દોરીથી ગળાના ભાગે મોટો કાપો પડી જવા પામ્યો હતો.

સાવચેતી જરૂરી : આપણી મજામાં અન્યને સજા ન મળે તેનું ધ્યાન રાખવું

ઉલ્લેખનીય છે કે, આ પ્રકારની ઘટનાઓમાં વાહન ચાલકો અને ખાસ કરી મોટરસાયકલ કે, અન્ય દ્વી ચક્રીય સાધનોના ચાલકો મુખ્યત્વે આવા અકસ્માતનો ભોગ બનતા હોય છે. ત્યારે આવા વાહન ચાલકોને અપીલ કરવામાં આવે છે કે, ઉત્તરાયણના તહેવારમાં દોરીથી ઘાયલ થવાની ગંભીરતા સમજી ગળામાં કોઈ કપડું કે, મફલર વીટી શકાય અથવા વાહન ચલાવતા દોરીનું ધ્યાન રાખી સાવચેતી પૂર્વક વાહન ચલાવીને અકસ્માતનો ભોગ બનતા બચી શકાય. જેથી આણંદમાં બનેલી આ બે ઘટનાઓ આવા વાહન ચાલકો અને પતંગ ચગાવતા લોકો માટે લાલ બત્તી સમાન ગણાવી શકાય એમ છે. પતંગ ચગાવતા લોકોએ પણ રોડ અને મુખ્ય માર્ગોનું ધ્યાન રાખી તહેવાર ઉજાવવો જોઇએ. જેથી આપણી મજામાં કોઈને સજા ન મળે.