આણંદમાં શનિવારે મોડી રાત્રે ખેલાયો ખૂની ખેલ, એકનું મોત બે ઘાયલ

આણંદઃ શહેરમાં સી પી કોલેજ પાસે વડાપાઉંનો વ્યવસાય કરતા પિતા અને પુત્ર દ્વારા બે લોકો પર જીવલેણ હુમલો કરતા એકનું મોત નીપજ્યું હતુ. તેમજ અન્ય એક યુવકને ગંભીર ઈજાઓ પહોંચી છે. શનિવારે મોડી રાત્રીના સુમારે બે મિત્રો પોતાના અન્ય મિત્રોને મળવા સી પી કોલેજ પાસે પહોંચ્યા હતા, જ્યાં બનાવના એક દિવસ અગાઉ મોબાઈલ અંગે બનેલ બનાવ અંગે આરોપીને પૂછતા વડાપાવની લારી ચલાવતા યુવકે બન્ને મીત્રો પર હુમલો કરી દીધો હતો, અચાનક થયેલ હુમલામાં મિત્રને છોડાવા વચ્ચે પડ્યો હતો તેના ઉપર પણ ઉશ્કેરાયેલા આરોપીઓએ હુમલો કરી ગંભીર ઇજા પહોંચાડી હતી, જેમાં એક યુવાનનું મોત નીપજ્યું હતું અને બેને ગંભીર ઇજાઓ પહોંચી હતી.

પ્રાપ્ત માહિતી અનુસાર મૈત્રીક આશિષ પટેલ તથા અન્ય મિત્ર શશાંક રાજેશભાઈ ભાટીયા બંને મિત્રો સિ પી કોલેજ પાસે આવેલ બાપુ ટી સ્ટોલ તથા તેની બાજુમાં આવેલું વડાપાવની લારી જે પંકજ ખુમાજી તેમજ તેના નાના ભાઈ નીલેશની છે. ત્યાં પોતાના એક્ટીવા પર પહોંચ્યા હતા જ્યારે બંને ત્યાં પહોંચ્યા ત્યારે વડાપાવની લારી પર નિલેશ પ્રજાપતિ અને તેના પિતા ખુમાનજી હાજર હતા.

નિલેશ વડાપાઉં બનાવતો હતો, એ વખતે શશાંક દ્વારા એક દિવસ અગાઉ બનેલા બનાવ અંગે પૂછતા નિલેશ ઉશ્કેરાઈ જતા વડાપાવની છરીથી શશાંક ભાટીયાની છાતીના ભાગે બે-ત્રણ વાર ઘા ઝીકી દીધા હતા. જેથી મિત્ર મૈત્રીક દ્વારા વચ્ચે પડતાં નિલેશ અને તેના પિતા દ્વારા મૈત્રીક પર પણ હુમલો કરાયો હતો, ત્યારે અન્ય બે લોકો પણ લોકોનો સાથ આપવા માટે પહોંચ્યા હતા, મૈત્રીકને પણ છાતીના ભાગે બે છરીના ઘા માર્યા હતા, તેમજ જમણા પગના સાથણ અને સાથળના પાછળના ભાગે પણ ઈજાઓ પહોંચાડી હતી.

શશાંકને છરીના ઘા ઝીકતા તાત્કાલિક સારવાર અર્થે નજીકમાં આવેલી ખાનગી હોસ્પિટલ ખાતે ખસેડવામાં આવ્યો હતો, જ્યાં ડોક્ટર દ્વારા તેને મૃત જાહેર કરવામાં આવ્યો હતો, ત્યારબાદ શશાંકના મૃતદેહને પીએમ અર્થે આણંદની સરકારી હોસ્પિટલ ખાતે ખસેડવામાં આવ્યો હતો.

બીજીતરફ અન્ય ઈજાગ્રસ્ત થયેલ મિત્ર મૈત્રીક પટેલને સારવાર અર્થે આણંદ ઓર્થોપેડિક હોસ્પિટલમાં દાખલ કરવામાં આવ્યો હતો.ઉલ્લેખનીય છે કે જિલ્લામાં બે દિવસમાં હત્યાનો આ બીજો બનાવ બનવા પામેલ છે. હાલ મૈત્રીક ના પોલીસ સ્ટેટમેન્ટ ના આધારે પોલીસે ગુનો નોંધી વધુ તપાસ હાથ ધરી છે જોકે ઘટનાની જાણ થતા રેન્જ IG એ.કે.જાડેજા તેમજ એસપી, ડીવાયએસપી, પી.આઈ સહિતનો પોલીસ કાફલો ઘટનાસ્થળે પહોંચી ગયો હતો અને ગુનો નોંધી ફરાર આરોપીઓ ની ધરપકડ માટે ચક્રો ગતિમાન કર્યા છે.