માહિતી પ્રમાણે, સરદારગંજમાં આવેલ એવરેસ્ટ ઓટો ઇલેક્ટ્રિક ગેરેજના માલિક યાસીનભાઈને ત્યાં મોગરના જયેશભાઈએ પોતાની ફોર્ચ્યુનર કાર રીપેરીંગમાં મૂકી હતી. આ કારની OLX પરની પોસ્ટ જોઇ એક ઠગે ફાયદો ઉઠાવવાનું કાવતરું ઘડી જયેશભાઇનો સંપર્ક કર્યો હતો. તેણે ટેસ્ટ ડ્રાઈવ માંગી હતી, જેથી જયેશભાઈએ ગાડી આણંદ રીપેરીંગમાં હતી ત્યાં જઈ ટેસ્ટ ડ્રાઈવ કરી લેવા જણાવ્યું હતું.
આરોપીએ એવરેસ્ટ ઓટો ગેરેજ પર જઈ ગાડીની ટેસ્ટ ડ્રાઈવ માંગતા યાસીનભાઈએ જયેશભાઈનો સંપર્ક કરી તેમના બંન્ને દીકરાઓને આરોપી સાથે શહેરમાં ટેસ્ટ ડ્રાઈવ માટે મોકલ્યા હતા. શહેરમાં ગાડી ચલાવવાની મજા નથી આવતી તેમ કહી આરોપીએ ગાડીને નેશનલ હાઇવે પર હંકારી મૂકી હતી. જ્યાં ચાવડાપુરા પાસે અવાવરી જગ્યાએ રિવોલ્વર બતાવી યાસીનભાઈના બંને પુત્રોને ગાડીમાંથી નીચે ઉતારીને આરોપી ફોર્ચ્યુનર ગાડીને લઈ ભાગી ગયો હતો.
આણંદ ટાઉન પોલીસને આ બાબતની જાણ થતાં આણંદ-ખેડા જિલ્લામાં નાકાબંધી કરાવી લીંબાસી પાસે ફિલ્મી ઢબે ગાડીનો પીછો કરી ખેડા પોલીસે ગઠિયાને ઝડપી પાડ્યો હતો. પ્રાથમિક તપાસમાં પોલીસે પકડેલ શખ્સનું નામ રાજવીરસિંહ દિલીપસિંહ વિહળા તેમજ તે મૂળ વિજાપુરનો વતની અને થોડા સમયથી ખંભાતમાં સ્થાયી થયેલો હોવાનું જણાવ્યું હતું. આરોપીએ પોતાની પાસે રહેલી રિવોલ્વર ફક્ત એરગન હોવાનું કબૂલ્યું અને તેને રસ્તામાં ફેંકી દીધાની કબૂલાત કરી હતી. લૂંટનું કારણ પૂછતા જણાવ્યું કે, પોતાના બાળકોની સ્કુલ ફી ભરવા માટે કારની ચોરી કરી હતી. પોલીસે સમગ્ર બાબતે ફરીયાદ દાખલ કરી વધુ તપાસ હાથ ધરી છે.