MLA સંગીતા પાટીલના નિવેદન પર રેશમા પટેલે કર્યો પલટવાર

એનસીપી નેતા રેશમા પટેલે MLA સંગીતા પાટીલના નિવેદનને વખોળ્યું છે અને ભારતીય જનતા પાર્ટી પર આકરા પ્રહાર કર્યા છે. રેશમા પટેલનો આ વીડિયો હાલ વાઇરલ થઇ રહ્યો છે.

• NCP મહિલા પ્રમુખ રેશમા પટેલે MLA પાટીલને પ્રજાની માફી માગવા કરી માગ
• ભાજપ અને ભાજપી નેતાઓ પર કર્યા આકાર પ્રહાર
• માફી માગો નહીં તો સવિનય કાનૂન ભંગની ઉચ્ચારી ચીમકી

આણંદઃ ધારાસભ્ય સંગીતા પાટીલના નિવેદનને વખોળતો રેશમા પટેલનો વીડિયો વાઇરલ થઇ રહ્યો છે. સંગીતા પાટીલ દ્વારા આપવામાં આવેલા વિવાદાસ્પદ નિવેદન પર એનસીપી મહિલા પ્રદેશ પ્રમુખ રેશમા પટેલ દ્વારા ભારતીય જનતા પાર્ટી પર આકરા પ્રહાર કરવામાં આવ્યા હતા. જે વીડિયો સોશિયલ મીડિયામાં ખૂબ જ વાઇરલ થયો છે.

ભાજપ અને ભાજપી નેતાઓ પર કર્યા આકાર પ્રહાર

આ વીડિયોમાં રેશમા પટેલ દ્વારા MLA સંગીતા પાટીલના નિવેદનને વખોડી કાઢતાં રાજ્ય પોલીસ વડા પ્રજા અને મુખ્ય પ્રધાન વિજય રૂપાણીને સંબોધીને અપીલ કરવામાં આવી છે. જે અંગે રેશમા પટેલનો સંપર્ક સાધવામાં આવતાં તેમના દ્વારા ભારતીય જનતા પાર્ટીના એમએલએ સંગીતા પાટીલના વિવાદાસ્પદ નિવેદનને લઇ પ્રજામાં જાગૃતિ લાવવા માટે પોલીસમાં પ્રજાલક્ષી કામો થાય અને સત્તાપક્ષના દબાણમાં આવી પોલીસ કામ ન કરે તે અંગે જાગૃતતા લાવવા માટે આ વીડિયો તેમણે બનાવ્યા હોવાની જાણકારી આપી હતી.

માફી માગો નહીં તો સવિનય કાનૂન ભંગની ઉચ્ચારી ચીમકી

MLA સંગીતા પાટીલ દ્વારા નિવેદન આપવામાં આવ્યું હતું કે, ભારતીય જનતા પાર્ટીના સદસ્ય બની જશો અને તે કાર્ડ તમે પોલીસને બતાવશો તો તેપણ તમને કશું નહીં કરે. આ પ્રકારના નિવેદનેના કારણે હવે રાજકારણ ગરમાયું છે. NCP આગેવાન રેશમા પટેલ દ્વારા આ નિવેદનને વખોડી કાઢવામાં આવ્યું છે. આ સાથે જ સંગીતા પાટીલને માફી માગવા માટે માગ કરી છે અને આમ નહીં થાય તો સવિનય કાનૂન ભંગની ચીમકી પણ ઉચ્ચારી છે.

હવે જોવું રહ્યું કે, સત્તાના જોરમાં આપવામાં આવેલા નિવેદન પર ભારતીય જનતા પાર્ટીના નેતાઓ કોઈ માફી માગે છે કે આ મુદ્દો આગામી સમયમાં આવી રહેલી સ્થાનિક સ્વરાજ્યની ચૂંટણીમાં રાજકીય પ્રચારનો ભાગ બને છે. હાલ તો આ મુદ્દે NCP આગેવાન રેશમા પટેલે આક્રમક શબ્દોમાં ભારતીય જનતા પાર્ટીના નેતાઓ સામે સવાલ ઉભા કર્યા છે.