મલેશિયામાં ફસાયેલા યુવાનોની આણંદના સાંસદ મિતેશ પટેલે મદદ કરી

આણંદઃ એક અઠવાડીયા પહેલા મલેશિયામાં ત્રણ ગુજરાતી યુવાનોને બંધક બનાવ્યા હોવાનો વીડિયો સોશિયલ મીડિયા પર વાયરલ થયો હતો. આ વીડિયોએ સમગ્ર ચરોતરમાં ચકચાર મચાવી દીધી હતી. આ વાતની જાણ આણંદના સાંસદને થતા તેમણે આ યુવાનોની મદદ કરી હતી.

મળતી માહિતી પ્રમાણે, બોરસદ તાલુકાના પીપળી ગામના ત્રણ યુવાન હિમાંશુ, સુનિલ અને પિયુષ મલેશિયામાં એક વર્ષ અગાઉ નોકરી માટે ગયા હતા. જ્યાં આ યુવાનોને બંધક બનાવ્યા હોવાનો વીડિયો વાયરલ થતાં સમગ્ર ચરોતરમાં ચકચાર મચી ગઈ હતી. આ વીડિયોની જાણ આણંદ જિલ્લાના સાંસદ મિતેશ પટેલને થતા તેમણે યુવાનોના પરિવારની રજૂઆતને સાંભળી હતી. ગણતરીના કલાકોમાં જ આ ત્રણેય યુવાનોને મલેશિયામાં ભારતીય દૂતાવાસની ઓફિસમાં શરણ આપાવવામાં મદદ કરી હતી.

આ ત્રણેય યુવાનોને મલેશિયામાં સુરક્ષિત રાખવામાં આવ્યા છે અને થોડાક દિવસોમાં જરૂરી કાર્યવાહી કરી સ્વદેશ પાછા લાવવાની તજવીજ હાથ ધરાશે. આ બાબતે મિતેશ પટેલે ETV ભારત સાથેની ખાસ વાતચીતમાં જણાવ્યું હતું કે, ભારતીય દૂતાવાસ દ્વારા 7 દિવસની અંદર આ યુવાનોને પરત મોકલી આપવાની માટેની કામગીરી પૂર્ણ કરી દેવામાં આવશે. જેથી આ યુવાનોના પરિવાર પણ આજે સરકાર દ્વારા મળેલ સહાયને કારણે અતિ આનંદની લાગણી અનુભવી રહ્યા છે.