આણંદમાં 5 લાખ માસ્કનું વિનામૂલ્યે થશે વિતરણ...

વૈશ્વિક મહામારી વચ્ચે ભારત દેશમાં છેલ્લા 50 દિવસ કરતા વધારે સમયથી લોકડાઉન છે અને તબક્કાવાર 3 લોકડાઉન જાહેર થઈ ચૂક્યા છે. હવે આવનારા સમયમાં લોકડાઉન 4માં ગુજરાત રાજ્યમાં પ્રજાને આંશિક છુટછાટ મળે તેવી આશા બંધાઈ રહી છે. ત્યારે કામ અર્થે બહાર નીકળતી પ્રજાની સલામતી માટે સલામતીના સાધનો ઉપલબ્ધ કરવાની આવશ્યકતાને પૂરી કરવા આણંદમાં રૂટ્સ ફાઉન્ડેશન કામે લાગ્યું છે.

આણંદ : જિલ્લાના વતની અને વર્ષોથી વિદેશમાં સ્થાઈ થયેલા તનુજ પટેલ રૂટ્સ ફાઉન્ડેશન ચલાવે છે. જેઓ લોકડાઉનના કપરા સમયમાં જરૂરિયાતમંદો માટે ભોજનની વ્યવસ્થા કરી રહ્યા છે. કહેવાય રહ્યું છે કે આવનારા સમયમાં લોકડાઉનમાં આંશિક રાહત મળશે. લોકડાઉનમાં લોકોને જ્યારે પણ આંશિક રાહત મળશે ત્યારે મોટી સંખ્યામાં લોકો બહાર ઉમટી આવશે. જેઓને રક્ષણ પૂરુ પાડવા માટે માસ્ક અને સેનેટાઇઝર ઉપલબ્ધ કરાવવા આવશ્યક બનશે.

આવનારા સમયની માગને સમજી તનુજ પટેલ રૂટ્સ ફાઉન્ડેશન દ્વારા 5 લાખ કોટન માસ્કનું ઉત્પાદન કરવામાં આવી રહ્યું છે. જેથી આગામી સમયમાં આણંદ જિલ્લામાં લોકોને નિઃશુલ્ક માસ્ક વિતરણ કરવામાં આવશે, સાથે જ 25 હજાર આલ્કોહોલ યુક્ત સેનેટાઇઝરની બોટલોનું વિતરણ કરવામાં આવશે.આ પ્રસંગે પૂર્વ રાજ્ય કક્ષાના પ્રધાન રોહિતભાઈ પટેલે જણાવ્યું હતું કે, તનુજભાઈ દ્વારા જ્યારથી લોકડાઉન શરૂ થયું ત્યારથી સેવા કરવામાં આવી રહી છે. જેમણે આવનારા સમયની જરૂરિયાતને પુરી પાડવા માટે 5 લાખ માસ્કનું વિતરણ કરશે. જેથી કોરોના સંક્રમણને ફેલાતું રોકી શકાય.

5 લાખ માસ્કનું વિનામૂલ્યે થશે વિતરણ

તનુજ પટેલના આ સેવા કાર્યમાં મિલસેંટ ગ્રૂપ અને કેંઝર ફેબ્રિક તેમને સહકાર આપી રહ્યા છે. તનુજ પટેલ દ્વારા રોજ 10 હજાર માસ્કનું ઉત્પાદન કરવામાં આવી રહ્યું છે. જે આવનારા સમયમાં જરૂરિયાતમંદ લોકોને નિઃશુલ્ક વિતરણ કરવામાં આવશે.