આજથી 50 વર્ષ પહેલા સાવરકુંડલાના માર્કેટિંગ યાર્ડમાં એક સાથે મજૂરી કામ કરતા ભિખાભી કુરેશી અને ભાનુશંકર પંડયા સમય જતા ગાઢ મિત્રો બની ગયા હતા. એક દિવસ મજૂરી કામ કરતા ભાનુશંકર પંડયાને અકસ્માતે પગમાં ઇજા થતા તેઓ મુશ્કેલીમાં મુકાયા હતા. સાવરકુંડલામાં અનાથ તરીકે રહેતા ભાનુશંકર પંડ્યાને ભીખાભાઇ કુરેશી તેમના ઘરે લઈને આવ્યા ત્યારથી ભાનુશંકર પંડયા તેમના જીવનના અંતિમ દિવસ સુધી કુરેશી પરિવાર સાથે રહ્યા હતા. જે બાદ ગઈ કાલે તેઓએ પણ અનંતની વાટ પકડી લેતા કુરેશી પરિવારે તેમની હિન્દુ વિધિ વિધાન સાથે અંતિમ વિધિ કરીને માનવતાનો સાચો ધર્મ નિભાવ્યો હતો.
મુસ્લિમ ભાઇઓએ હિન્દુ મિત્રના હિન્દુ વિધિ વિધાન સાથે અંતિમ સંસ્કાર કરી આપી એકતાની અનોખી દાસ્તાન