Today Gujarat Weather: ગુજરાત અગનભઠ્ઠી બનવા તરફ, 5 શહેરમાં તાપમાન 40 ડિગ્રીને પાર

રાજ્યમાં ઉનાળો પોતાનો અસલી રંગ દેખાડી રહ્યો છે. ખાસ કરીને બપોરના સમયે સખત ગરમી પડી રહી છે. વહેલી સવારે થોડી ટાઢક અનુભવાય છે પણ સૂર્યોદય થતા ગરમીનો પ્રકોપ શરૂ થઈ જાય છે. જ્યારે બફારાને લોકો અકડાઈ ઊઠે છે. અકળાવી નાંખે એવી ગરમીને કારણે માહોલમાં સતત ગરમાવો અનુભવાય છે.

અમદાવાદઃ રાજ્યભરમાં આકરી ગરમી પડવાનું શરૂ થઈ ગયું છે. બપોરના સમયે શહેર જાણે અગનભઠ્ઠી બની રહ્યા હોય એવો અનુભવ થઈ રહ્યો છે. સતત પડી રહેલી ગરમીને કારણે લોકો તોબા પોકારી ગયા હતા. સોમવારે રાજ્યના પાંચ શહેરનું તાપમાન 40 ડિગ્રીને પાર થઈ ગયું હતું. પરિસ્થિતિને ધ્યાને રાખીને યલો એલર્ટ જાહેર કરી દેવામાં આવ્યું હતું. અમરેલીમાં સૌથી વધારે તાપમાન 42 ડિગ્રી અને અમદાવાદમાં 41.9 ડિગ્રી નોંધાયું છે. જ્યારે સુરેન્દ્રનગર 41.6 અને ગાંધીનગર તથા રાજકોટમાં 41.5 ડિગ્રી તાપમાન નોંધાયું છે. સતત વધી રહેલા તાપમાનને કારણે શહેરના રસ્તાઓ સુમસાન બન્યા હતા.

ક્યા કેટલું તાપમાનઃઅમરેલીમાં 42.0, અમદાવાદ 41.9, ડીસા 38.8, ગાંધીનગર 41.5, વિદ્યાનગર 39.7, વડોદરા 40.2, સુરત 39.5, વલસાડ 37.0, ભુજ 38.0, નલિયા 34.4, કંડલા એરપોર્ટ 40.3, ભાવનગર 39.5, દેવભૂમિ દ્વારકા 32.3, પોરબંદર 32.0, રાજકોટ 41.5, સુરેન્દ્રનગર 41.6, મહુવા 38.8 તેમજ કેશોદમાં 39.5 ડિગ્રી નોંધાયું છે. ભારતમાં છેલ્લા બે મહિનાથી જુદા જુદા રાજ્યના તાપમાનમાં સતત વધારો થઈ રહ્યો છે. દેશના અનેક એવા મહાનગરમાં તાપમાન 42 ડિગ્રીને પાર થઈ ગયું છે. પાંચ રાજ્યમાં સતત લૂં નો અનુભવ થઈ રહ્યો છે. પશ્ચિમ બંગાળમાં તો શાળા તેમજ કૉલેજ બંધ કરવા પડ્યા એવી સ્થિતિ છે. ભારતીય હવામાન ખાતાની યાદી અનુસાર પંજાબ, હરિયાણા, બિહાર, પશ્ચિમ બંગાળ, આંધ્ર પ્રદેશમાં સતત લૂં નો અનુભવ થઈ રહ્યો છે.

મોટી આગાહીઃ આગામી પાંચ દિવસમાં તાપમાનમાં નોંધપાત્ર વધારો થવાની સંભાવના છે. ગરમીનું જોર હજું પણ વધવાના એંધાણ છે. જોકે, સાંજ પડતા જ રાહત અનુભવાશે. હજું પણ ગરમીમાં વધારો થશે તો લોકોની પરેશાનીમાં વધારો થવાની પૂરી શક્યતાઓ છે. આવનારા દિવસો દરિયાકિનારાથી લઈને મેદાની પ્રદેશ સુધીના વિસ્તારમાં ભારે ગરમીની અસર કરનારા રહેશે.

ઓરેન્જ એલર્ટઃ દેશના અનેક ભાગમાં હીટવેવને લઈને એલર્ટ આપવામાં આવ્યું છે. બિહારના પટણામાં 42.2 ડિગ્રી તાપમાન નોંધાતા દિવસના સમયમાં પણ રસ્તાઓ સુમસાન જોવા મળ્યા છે. છેલ્લા એક અઠવાડિયાથી સૂર્યદેવ આકરા મિજાજમાં હોય એવું લાગી રહ્યું છે. દિલ્હીમાં આવેલો નજફગઢ વિસ્તાર સૌથી ગરમ હોવાનો રીપોર્ટ મળ્યો હતો. જ્યાં સૌથી વધારે તાપમાન 43 ડિગ્રી સામે આવ્યું છે. હવામાન જ્યારે ખરાબ હોય ત્યારે ઓરેન્જ એલર્ટ આપવામાં આવે છે. આ એક રીતે જોખમી છે. ઓરેન્જ એલર્ટ એટલે સ્થિતિ ગમે ત્યારે પલટી શકે છે. આવી સ્થિતિમાં કોઈ રીતે બેદરકારી ન કરવી જોઈએ.

રેડ એલર્ટઃજ્યારે હવામાન અત્યંત ખરાબ હોય ત્યારે આ એલર્ટ આપવામાં આવે છે. જે મોટું નુકસાન કરી શકે છે. સુરક્ષાના પગલાં પહેલા ધ્યાને લેવા પડે એવી સ્થિતિ એટલે રેડ એલર્ટ, ઠંડીની સ્થિતિ હોય ત્યારે અને ગરમીની હદપાર થાય ત્યારે રેડ એલર્ટ આપવામાં આવે છે. પણ જ્યારે ચોમાસામાં રેડ એલર્ટ જાહેર કરવામાં આવે છે ત્યારે પૂરના એંધાણ, તોફાન તથા તારાજી સર્જી શકે એવી સ્થિતિ દર્શાવે છે. રેડ એલર્ટ અપાયા બાદ કોઈ પ્રકારની બેદરકારી ન કરવી જોઈએ. જ્યારે પણ રેડ એલર્ટ આપવામાં આવે છે ત્યારે તંત્ર તરફથી આગોતરી તૈયારીઓ શરૂ કરી દેવામાં આવતી હોય છે.

ગ્રીન એલર્ટઃગ્રીન એલર્ટ એટલે હવામાન એકદમ સ્વચ્છ છે. કોઈ વાતની ચિંતા કરવાની જરૂર નથી. સૌથી સુરક્ષિત વાતાવરણ અને સારી હવાનો સંકેત છે. જેના કારણે કોઈ નુકસાની થવાની નથી. ગ્રીન સિગ્નલ આપવામાં આવે ત્યારે ખાસ કોઈ ગંભીર થવાની જરૂર હોતી નથી. હવામાનને લઈને કોઈ ચિતાનો માહોલ નથી.