કોરોનાથી ડરવાની જરૂર નથી, સાવેચતી ખૂબ જ જરૂરી છેઃ એઈમ્સ ડાયરેક્ટર ડૉ. રણદીપ

મુખ્યપ્રધાન વિજય રૂપાણીએ કેન્દ્રીય ગૃહપ્રધાન અમિતભાઇ શાહને પ્રવર્તમાન કોરોના(કોવિડ-૧૯)ની સ્થિતિમાં ગુજરાતમાં માર્ગદર્શન માટે શ્રેષ્ઠ તબીબોની ટીમ મોકલવા કરેલી રજૂઆતને પગલે એઈમ્સ નવી દિલ્હીના ડાયરેકટર અને વરિષ્ઠ તબીબ ડૉ. રણદીપ ગુલેરીયા અને ડૉ. મનીષ સુનેજાએ આજે શનિવારે સિવિલ હોસ્પિટલની મુલાકાત લીધી હતી.

અમદાવાદઃ એઈમ્સના બે ડૉકટરની ટીમે આજે શનિવારે અમદાવાદની સિવિલ હોસ્પિટલની કોવિડ-19ની વિશેષ હોસ્પિટલની મુલાકાત લીધી હતી. અધિક મુખ્ય સચિવ અને સમગ્ર રાજ્યમાં કોરોના સંદર્ભે થતી કામગીરી પર દેખરેખ રાખવા ખાસ નિમાયેલા પંકજકુમારે આ બન્ને વરિષ્ઠ તબીબો સાથે વિસ્તૃત ચર્ચા કરી હતી.

કોરોનાની સારવાર લેતા દર્દીઓ ઝડપથી સાજા થાય, દર્દીઓને અપાતી સારવાર પદ્ધતિ, આ વરિષ્ઠ તબીબોની આ રોગ સંદર્ભે તેમના અનુભવો-જાણકારી વગેરે અંગે ખૂબ જ ઝીણવટપૂર્વક ચર્ચા કરી હતી. આ મુલાકાત બાદ એઇમ્સના ડાયરેક્ટર ડૉ. રણદીપ ગુલેરીયાએ જણાવ્યું હતું કે, કોરોના વાયરસના સંક્રમણ સામે લડવામાં ગુજરાત સરકારે જે પ્રયાસો કર્યા છે તે સરાહનીય છે.

રાજ્ય સરકારે કોરોનાનો મૃત્યુદર ઘટાડવા સમગ્રતયા ધ્યાન કેન્દ્રિત કર્યું છે તે ખરેખર પ્રશંસનીય છે. સાથેસાથે અહીંના તબીબો અને અન્ય સંલગ્ન સ્ટાફે ખૂબ સરસ રીતે દર્દીઓની સેવા સારવાર કરી છે. ખૂબ જ ટૂંકા સમયમાં 1200 બેડની હોસ્પિટલ અને સમગ્ર માળખું તૈયાર કરવા બદલ રાજ્યના આરોગ્ય તંત્રની સરાહના કરતાં તેમણે જણાવ્યું હતું કે, જે કંઈ ઈન્ફ્રાસ્ટ્રક્ચર માળખું ઊભું કરવામાં આવ્યું છે તે ખૂબ જ અદ્યતન છે જે દેશ માટે ગૌરવની વાત છે. તેમણે રાજ્યના સરકારી અને ખાનગી ડૉક્ટર સાથે પણ વાર્તાલાપ કર્યો હતો. કોરોના સંક્રમણ સામે લડી રહેલા ફ્રન્ટલાઈન વોરિયર્સને પણ મળીને સઘળી વિગતો જાણી હતી.

કોરોનાથી ડરવાની જરૂર નથી, સાવેચતી ખૂબ જ જરૂરી છેઃ એઈમ્સના ડાયરેક્ટર ડૉ. રણદીપ ગુલેરીયા

તેમણે વધુમાં જણાવ્યું હતું કે, લોકોએ રોગથી ડરવાની જરૂર નથી, પરંતુ સાવચેતી જરૂર રાખવી પડશે. કોવિડ-19ના લક્ષણો જણાતાં તુરંત જ હોસ્પિટલનો સંપર્ક કરી ટેસ્ટ કરાવવા માટે આગળ આવવું જોઈએ. મોટી ઉંમરના વ્યક્તિઓ અને comorbid લક્ષણો ધરાવતાં દર્દીઓ કોરોના વાયરસથી સંક્રમિત થયાના વધુ દિવસો બાદ જ્યારે દાખલ થાય છે ત્યારે તેઓને તકલીફ વધી જાય છે એ પણ એટલું જ સત્ય છે.ઉપરાંત એસિમ્ટોમેટીક દર્દીઓમાં પણ વાયરસ તેનો પ્રભાવ બરકરાર રાખે છે અને વ્યક્તિના શરીરમાં ઓક્સિજનનો ઘટાડો થતો હોય છે, જેનો દર્દીને ઘણી વાર ખ્યાલ રહેતો નથી. તેને પગલે ન જોઈતાં પરિણામો ભોગવવા પડે છે. કોરોના સામેની લડાઈમાં રાજ્ય સરકારની માર્ગદર્શિકા અનુસરવા લોકોને અપીલ કરતા તેમણે ઉમેર્યું હતું કે, લોકજાગૃતિ અને લોકસહકાર વિના આ જંગ જીતવો મુશ્કેલ છે, ત્યારે સોશિયલ ડિસ્ટન્સ, લૉક ડાઉનનો ચુસ્ત અમલ અને રક્ષણાત્મક પગલાં અત્યંત જરૂરી છે. એમ તેમણે ઉમેર્યું હતું.