શિક્ષણ પ્રધાન ભુપેન્દ્રસિંહ ચૂડાસમાનું ધારાસભ્ય પદ સલામત, ચૂંટણી રદ કરવાના હાઈકોર્ટના ચુકાદા પર સુપ્રીમનો સ્ટે

વર્ષ 2017 ધોળકા વિધાનસભા ચૂંટણીમાં ભ્રષ્ટાચાર થયું હોવાનું સ્વીકારતા ગુજરાત હાઈકોર્ટે ભૂપેન્દ્રસિંહ ચુડાસમા ધોળકા વિધાનસભા બેઠકની જીતને રદ કરવાના આદેશ પર શુક્રવારે જસ્ટિસ શાંતાનુગુદર અને જસ્ટિસ સુભાષ રેડ્ડીની ખંડપીઠે સ્ટે આપ્યો હોવાની વિગતો સામે આવી છે. સુપ્રીમ કોર્ટ તરફથી ભુપેન્દ્રસિંહને મોટી રાહત મળી છે.

અમદાવાદઃ ગુજરાત હાઇકોર્ટના ચુકાદા સામે શિક્ષણ પ્રધાન ભૂપેન્દ્રસિંહ ચુડાસમા સુપ્રીમ કોર્ટમાં અરજી દાખલ કરી હતી. મંગળવારે ગુજરાત હાઇકોર્ટના જસ્ટિસ પરેશ ઉપાધ્યાયે શિક્ષણ પ્રધાન ભુપેન્દ્ર ચુડાસમાની જીતને રદ જાહેર કરી છે. હાઇકોર્ટ કોંગ્રેસી ઉમેદવાર અશ્વિન રાઠોડના પક્ષમાં ચુકાદો આપ્યો છે.

હાઇકોર્ટે ચુકાદામાં મહત્ત્વના અવલોકન કરતાં જણાવ્યું હતું કે, ધોળકાના ચૂંટણી અધિકારી ધવલ જાની દ્વારા ભૂપેન્દ્રસિંહ ચુડાસમાને લાભ કરવા માટે ભ્રષ્ટાચાર આચર્યો હતો. હાઈકોર્ટે આ વાતને માન્ય રાખીને ચુડાસમાની જીતને રદ જાહેર કરી છે.

આ અગાઉ ભુપેન્દ્ર ચુડાસમાના વકીલ નિરૂપમ નાણાવટ્ટીએ આ કેસમાં વધુ સાક્ષીઓની ઉલટ તપાસની જરૂર ન હોવાથી પુરાવવા બંધ કરવાની માંગ કરતા કોર્ટે તેને રેકોર્ડ પર લીધી હતી. અરજદાર તરફથી કરાયેલી અરજીમાં અગાઉ ભુપેન્દ્ર ચુડાસમા તરફથી પોતાની તરફેણમાં સાક્ષીઓ તપાસવાની યાદી અદાલત સમક્ષ રજુ કરાઈ હતી. ધોળકા વિધાનસભાના અપક્ષ ઉમેદવાર જાવેંદ મીંયા કાદરીએ સાક્ષી તરીકે પુરાવવા આપવાનો ઈન્કાર કર્યો હતો. જેથી ભુપેન્દ્ર ચુડાસમાએ પોતે જુબાની આપવાની તૈયારી બતાવી હતી. ચુડાસમાની જુબાની પૂર્ણ થતાં તેમના પછી કોર્ટમાં જુબાની કોણ આપશે તેનું નામ આપવાનું હતું જોકે તેમના વકીલે વધું સાક્ષીઓને ન તપાસવાની રજુઆત કરી હતી.

ભુપેન્દ્ર ચુડાસમાએ જુબાની દરમિયાન હાઈકોર્ટની કામગીરી સામે વાંધો વ્યકત કરતી દાખલ કરેલી સુપ્રિમ કોર્ટમાં અરજી મુદે જસ્ટીસ પરેશ ઉપાધ્યાયની કોર્ટમાં માફી માંગી હતી. જેના જવાબ કોર્ટે કહ્યું કે, અમને તેની જરૂર નથી. ચુડાસમાની બે દિવસ જુબાની ચાલી હતી. જેમાં તેમને મત-ગણતરી સેન્ટરના સીસીટીવી ફુટેજ બતાવવામાં આવ્યા હતા અને સીસીટીવીમાં દેખાતા શંકાસ્પદ વ્યકિતને કાયદા પ્રધાને પોતાનો ઓફિસ આસિટન્ટ ગણાવ્યો હતો.

ઉલ્લેખનીય છે કે, તે જ વ્યકિતને ઓળખવા મુદે ચુંટણી અધિકારી ધવલ જાનીએ અત્યાર સુધી હાઈકોર્ટને કોઈ જવાબ આપ્યો નથી.

વર્ષ 2017 ધોળકા વિધાનસભા જીતને પડકારતી રિટ મુદે કાયદા પ્રધાન ભુપેન્દ્ર ચુડાસમા 27મી ઓગસ્ટના રોજ જસ્ટીસ પરેશ ઉપાધ્યાયની કોર્ટમાં સાક્ષી તરીકે હાજર રહી જુબાની આપી હતી. ધોળકા વિધાનસભા બેઠકથી ભુપેન્દ્ર ચુડાસમા 327 મતથી જીત્યા હતા, જેને કોગ્રેસના ઉમેદવાર અશ્વિન રાઠોડ દ્વારા પડકારવામાં આવી હતી. અશ્વિન રાઠોડે ચુડાસમા પર મત-ગણતરીમાં ગેરરીતિ આચરી હોવાના આક્ષેપ સાથે હાઈકોર્ટમાં રિટ દાખલ કરી હતી.